Savissivimmi Upernavimmilu qilalukkat qernertartassat ilaneqarput

Savissivimmi Aqutsiveqarfimmilu Upernavimmi qilalukkanik qernertanik pisassiissutit ilaneqarnerat.

2014-imi juunip pingajuani (03.06.14) Naalakkersuisunit aalajangerneqarpoq 2014-imi aqutsiveqarfimmi Upernavimmi aamma Savissivimmi qilalukkanik qernertanik pisassiissutit 30-nik ilaneqassasut.

Upernaviup aqutsiveqarfiani piniartut, qilalukkanik qernertanik 2014-imi pisassiissutit ilaneqarnissaannik Aalisarnermut, Piniarnermut Nunalerinermullu Naalakkersuisoqarfimmut allagaqaateqarsimapput. Qilalukkanik qernertanik pisassiissutit nungoreersimammata puisillu mamaarnerisa nalaani puisit amiinik tunisineq uninngatinneqarmat qaleralinnillu tunisineq aamma matoqqalluni, qinnuteqaatigineqartoq akuerineqarsimavoq.

Pisassiissutinik qaffaassutaasut katillugit 30-iupput taakkunanngalu 20-it Savissivimmi, Kullorsuarmi Nuussuarmilu piniartunut immikkoortinneqarput, piumasarineqarporlu piniariaasitoqqat atorlugit – tassa qaannamik piniarneqassasut aallaaneqartinnagillu naalinneqassallutik. Pisassiissutinut ilassutaasut sinneri 10-it, Qaasuitsup Kommuunianut aqutsiveqarfik Upernavimmi agguaassassanngortinneqarput.

Qilalukkanik qernertanik piniarneq, Qilalukkanik qaqortanik qernertanillu illersuineq piniarnerlu pillugit Namminersorlutik Oqartussat nalunaarutaat nr. 7, 29. marts 2011-imeersoq naapertorlugu ingerlanneqassaaq.


Paasissutissat sukumiinerusut uani piniarneqarsinnaapput:
Piniarnermut Aallaaniarnermullu immikkoortortaqarfimmi allaffimmi pisortaagallartoq Peter Løvstrøm,
pelo@nanoq.gl, +299 345 342