Narsami kalaallit nerisassiaataat pillugit workshoppeqarneq

Sapaatip akunnerata siuliata naanerani (10.-12. maj 2014) Aalisarnermut, Piniarnermut Nunalerinermullu Naalakkersuisoqarfik (APNN) Ny Nordisk Mad suleqatigalugu INUILImi kalaallit nerisassiaataasa atugaanerat pillugu susassaqartunik workshoppeqartitsivoq.

Kalaallit nerisassiaataasa qanoq atugaanerulersinnaanerat ukiuni kingullerni oqallisigineqartuartoq qanoq iliuuseqarfigineqarsinnaanersoq workshoppemi qulequtarineqarpoq. Nunatsinni susassaqartut assigiinngitsut tunulequtarisatit ulluinnarnilu kalaallit nerisassiaat pillugit suliatik aallaavigalugit isummersoqataapput.

Kalaallit nerisassiaataat eqqarsaatigalugit peqataasut uummammiorisaat pingaartitaallu aallaavigalugit qanoq alloriaqqissinnaaneq oqallisigineqarpoq. Narsaq-gruppemik taaneqartumik suleqatigiissitamik pilersitsisoqarpoq. Sapaatip akunnerini aggersuni susassaqartunik allanik suleqatigiissitamut ilannguttoqarnissaa sulissutigineqassaaq suleqatigiissitaliallu siunertai anguniagassaalu inaarsarneqassallutik.

Suleqatigiissitami Edda Lyberth siuttuusussatut toqqarneqarpoq, Kalaallit nerisassiaataannik soqutigisaqarluarnera atorluarumallugu. Kalaallit nerisassiaataasa atugaanerisalu siuarsaavigineqarnissaannut soqutiginnilluartut suleqatigiissitaliamut ilaatinneqarnissaat pingaartinneqarpoq, anguniakkap pingaartinneqarluni sulissutigineqarniassammat.

Ny Nordisk Mad-imi aqutsisut Kalaallit Nunaanni ataatsimiinnerat iluatsillugu workshoppimik aaqqissuusseqatigineqarput, nunanilu avannarlerni misilittagarineqartunik isumassarsiorfigineqarsinnaasunik saqqummiisinneqarlutik. Norgemi, Danmarkimi Ålandimilu nerisaqarnermi qanoq siuarsaasarnermi suleriuutsit misilittakkallu saqqummiisunit eqqartorneqarput workshoppimilu peqataasunit oqallisigineqarlutik. Ny Nordisk Mad-ip aqutsisuini suleqatigiissitaliaanilu Ålandimit aallartitarineqartut annertuumik workshoppimut tunniussisinnaasimapput, pingaartumik suleqatigiissitaliamik pilersitsisoqassagaluarpat qanoq aaqqiissuussisoqarsinnaanera eqqarsaatigalugu.