Tunngavissaqanngitsumik isornartorsiuineq

Nutaamik nalimmassaasariaqarnissamut tunngatillugu suliap tunngavissaqanngitsumik isornartorsiorneqarnera

Nalimmassaasarneq pillugu nutaamik aaqqissuussinissap ataatsimoortumillu tapiissutit pillugit isumaqatigiissutip isumaqatiginninniutigisavut pillugu Kommuneqarfik Sermersuumi borgmesterip Asii Chemnitz Narup oqaaseqaatai maluginiarpakka.

Borgmesteri isumaqarpoq suleriaaseq kusananngitsoq tukallunilu, taamaattumik naleqquttumik sivisuumillu atorneqartussanik aaqqiissutissamik nassaarnissamut neriuuteqarpallaartitsinngitsoq.

Suliap ingerlanneqarnerata taamatut saqqummiunneqarnera akuerisinnaanngilluinnarpara!

Kommunit tamarmik Namminersorlutik Oqartussat KANUKOKA-lu peqatigalugit januaarimili nalimmassaasarneq pillugu nutaamik aaqqissuussinissaq pimoorullugu suliaraat. Peqataasut allat arlaannaataluunniit suliaq naqqissorsimanngilaat, nutaamilli isumaqatigiissuteqarnissaq nammaqatigiissuteqarusullutik suliarisimallugu. Kikkut tamarmik periarfissat assigiinngitsut pillugit aningaasaqarnikkut naatsorsuisoqarnissaanut kissaatigisaminnik saqqummiisinnaasimapput aammalu naatsorsukkat amerlasuut suliarineqarsimapput ataatsimiinnerpassuillu ingerlanneqarnikuullutik. Tamarmik suliap ingerlanneqarneranut naligiimmik sunniuteqarsinnaasimapput, aamma Kommuneqarfik Sermersooq. Tamatta soqutigaarput naleqquttumik sivisuumillu atuuttussamik aaqqiissuteqarnissaq.

Sulialli ingerlanneqarnera tamakkerlugu erseqqippoq kommunit akornini annertuumik isumaqatigiinngitsoqartoq. Oqaatigereerpara tamanna pissusissamisuuginnartoq, tassa ilaatigut Kommuneqarfik Sermersuup ullumikkumut sanilliullugu nalimmassaanissamut annertunerusumik tunniussaqartariaqarmat. Kommunit tamarmik innuttaminnik naligiimmik sullissinissamut periarfissaqarniassammata kommunit akornini pitsaanerusumik naligiissaarisoqarnissaa pisariaqarluinnarpoq.

Isumaqarpunga suliamik isornartorsiuinerup sulinerput pisariaqanngitsumik akornusersoraa, kaammattuutigaaralu ataatsimoorluta suliaqarnitsinnut nukiit atorneqarnissaat. Aalajangerpara isumaqatigiissut kingusinnerpaamik ulloq 11. august inissereersimassagipput.