Isumaqatigiissut nutaaq

KANUKOKA Naalakkersuisut

Nalimmassaanissamut isumaqatigiissut nutaaq pitsaanerusumik oqimaaqatigiisitsissaaq

Namminersorlutik Oqartussat KANUKOKA-lu ullumi ataatsimiipput. Nalimmassaanissaq ataatsimoorussamillu tapiissutit nutaamik ilusilerneqarnissaasa eqqartuiffiginerqarnerinik ilaatigut oqaluuserisassat imaqarlutik.

KANUKOKA-p siulittaasua Martha Abelsen ima oqaaseqarpoq:
Kommunit aningaasaqarnikkut inissisimanerat annertuumik tatisimaneqarpoq, kommunillu innuttaasuminnik sullissinissaminnut periarfissaat assigiinngissuteqarpoq. Kommunit assigiimmik atugassaqartitaanissaasa isumannaarneqarnissaa pisariaqarpoq. Suli annertuumik suliassaqarpugut, taamaattorli nunami naligiinnerunissap isumannaarneqarnissaa siunertaralugu nutaamik ilusiliilluni nalimmassaanissaq pillugu oqallisiginninnitsinni ingerlariaqqippugut.


Aningaasaqarnermut Nunamullu namminermut naalakkersuisoq Vittus Qujaukitsoq ima oqaaseqarpoq:
”Kommunini tamani oqimaaqatigiissumik ineriartortitsinissaq Naalakkersuisut kommunillu kattullutik akisussaaffigaat. Iluarsiissutissamik nutaamik naapertuuttumillu nassaarniarluni annertuumik sulisoqarsimavoq.

Kommunit akornanni qanoq annertutigisumik qanorlu ilusilimmik nalimmassaasoqarnissaa pillugu kommunit akornanni isumaqatigiinngitsoqarnera isertugaanngilaq. Tamanna aamma pissusissamisoorpoq! Aningaasarpassuit pineqarput, kommuneqarporlu aningaasanik kommuninut allanut nuussisariaqartussanik. Taamaattorli isumaqarpunga kikkut tamarmik angusaqarusussusermik nammaqatigiikkusussusermillu anersaaqarnerminnik takutitsillutik sulisut, suliarlu naammassineqartoq annertooq ataqqivara. Naapertuilluartumik iluarsiissuteqarnissaq tamatta soqutigisaraarput.

Qaammatini tulliuttuni marlussunni kommuninik, ataasiakkaarlugit isumaqatigiinniuteqarfiginnissaagut, Naalakkersuisut kommunit KANUKOKA suleqatitut peqataatillugu isumaqatigiissummik nassaarnissartik qanilliartoraat nuannaarlunga maluginiarpara. Kingusinnerpaamik tulliani ataatsimiinnissatsinni ulloq 11. august 2014 iluarsiissutissamik nassaassaagut.

Innuttaasut sullinneqarnerinut tunngatillugu pisortat allaffissorneranni nutarterilluta suliatsinnut kommuninit tamakkiisumik taperserneqarpugut. Naalakkersuinikkut oqallisiginnilluta ulloq augustip 11-iani 2014 aallartittumik, ataqatigiissaarinikkut iluarsartuusseqqinnerup nalilersorneranik suliatsinnut aamma kommunit tapersiinerat nuannaralugu maluginiarpara.”