Atuartut erinarsortut Facebook-ikkut ajugaasinnaapput

Eqqaaviit atornissaat pillugu erinarsuut Qujanaq atorlugu erinarsoritsi, nipilersoritsi qitigitsiluunniit - aammalu atuarfimmi atuaqatigiinnut 10.000 koruuninik eqquillusi.
Avatangiisinut Pinngortitamullu Naalakkersuisoqarfimmit Kalaallit Nunaanni atuartunut tamanut neqeroorut taama nipeqarpoq.

Eqqaavik atoruk
Julie Berthelsenip erinarsugaa Qujanaq eqqaaviit atornissaat pillugu paasititsiniaanermi nutaami erinarsuutaavoq tusaqqoornartoq, aammalu atuartut tamarmik erinarsoqataajumaartut Avatangiisinut Pinngortitamullu Naalakkersuisoqarfiup neriuutigaa.

- Erinarsuut nuannerluinnartuuvoq, eqqaavimmik atuinissamut aammalu Kalaallit Nunaata paarilluarneqarnissaanut tunngasoq. Nuna tamakkerlugu erinarsorneqarsinnaalernissaanut meeqqat ikiortigerusuttorujussuuagut, Avatangiisinut Pinngortitamullu Naalakkersuisoq Kim Kielsen oqaluttuarpoq.

Atuarfiit tamarmik
Atuarfiit tamarmik tujuuluaqqanik Qujanaq-mik allassimasunik, cd-mik, erinarsuummik imalimmik aammalu unammititsinissaq pillugu nassuiaammik nassiussivigineqassapput.
Maleruagassat malikkuminartuupput. Erinarsoqatigiittussat amerlasuunik ikittunilluunniit ilaaffigineqartut erinarsuummik tusarnaartitsisussat katersorneqassapput, taakkua videoliaaqqamik immiussissapput taannalu paasititsiniaanerup Qujanaq-p Facebook-ikkut nittartagaanut ikkunneqassalluni.
Septembarimi taakku akornanni videoliaq pitsaanerpaaq, Facebook-ikkut likes-inik amerlanerpaanik pissarsisoq toqqarneqassaaq. Ajugaasoq atuarfimmi atuaqatigiinnut 10.000 koruuninik pissarsissaaq. Aningaasat atuaqatigiinni ataatsimut sammisaqartitsinermut atorneqassapput.

Pinngortitaq alianaatsoq
Meeqqat nassaassarsiullaqqikkumaartut Kim Kielsenip neriuutigaa.

- Eqqaaviup atornissaa aammalu Kalaallit Nunaata paarilluarnissaa tassani pineqarpoq. Tamanna videoliami ersersinneqarsinnaavoq. Taamaattumik neriuppunga, Kalaallit Nunaanni pinngortitaq alianaatsoq eqqagassanik takusassaqarfiunngitsoq pillugu videolianik pissanganartunik nuannersunillu takusaqarumaartugut, Kim Kielsen oqarpoq.

Julie: Meeqqat erinarsullaqqeqaat
Erinarsuutip allatut nutaamik takutinneqarnissaanut Julie Berthelsen qilanaarpoq.

- Kalaallit meerartaat erinarsullaqqissuusut ilisimavara. TV2-p unammititsinerani All Stars-imi ajugaagatta tamanna takutipparput. Aamma meerarpassuit pinngortitaq pillugu iliuuseqarusussasut, aammalu Kalaallit Nunaannit paarsilluaqataarusussasut qularinngilara.