Eqqaaviit erinarsortartut ikiuunnissinnut qujapput

Qujanaq qujanaq, eqqaavinnit immikkut ittunit, maajip naanerani maannamuugallartoq illoqarfinnut sisamanut inissinneqarsimasunit Julie Berthelsenip nipaa qimaasoq taamatut nipeqarpoq.

Qujanaq paasititsiniaanermut, inuit tamarmik eqqaavinnik atuisalernissaannut anguniagaqarfiusumut atsiunneqarpoq. Taanna maannakkut maajimi aallartippoq, septembarillu tungaanut ingerlassalluni.

- Kalaallit Nunaata minguinnerulernissaata aallunneqarnerunissaa anguniarlugu oqaluttuaq nuannersoq toqqarparput. Taamaattumik eqqaavinnik atuisut tamaasa qujalluta erinarsorfigisarniarpavut. Igitassanik eqqaavimmut igitsigaanni pinngortitamik minguinnerulersitseqataasoqassaaq, tamannalu tamatta soqutigisaraarput, Avatangiisinut Pinngortitamullu Naalakkersuisoq Kim Kielsen oqarpoq.

Nuannarisaq
Erinarsuut Qujanaq paasititsiniaanermut tunngatillugu sanajuvoq, aammalu nuannarineqarlualerumaartoq Kim Kielsen neriuppoq.

Oqaluttuarpoq, meeqqat kalaallit paasititsiniaanermi Qujanaq-mi immikkut suliniuteqarsimasut. Maniitsup atuarfiani aamma Nuup Atuarfiani 6. klassini atuartut Julie Berthelsen peqatigalugu tusarnaartitsissapput, erinarsuut Qujanaq namminerluinnaq ilusilerlugu erinarsussallutik nipilersussallutillu. Maniitsumi pingasunngornermi maajip ulluisa 21-anni aamma Nuummi tallimanngornermi maajip ulluisa 23-anni tusarnaartitsisoqassaaq, taakku marluullutik nal. 16 pissallutik.

- Neriuppugut tusarnaarianik aggialluartoqarumaartoq, aammalu meeqqat namminneerlutik eqqaaviit atortarumaaraat, angajoqqaatillu tamanna pillugu oqaluttuuttarumaaraat qularinngilara. Pinngortitaq eqqagaqartinngilluinnassagutsigu, minnerunngitsumik meeqqat pinerullugit tamanna anguniartussaavarput. Taakkumi siunissami pinngortitaq inuuffigisussaavaat, Kim Kielsen oqarpoq.

Nammineerluni uumitsattarpoq
Innuttaasunit eqqakkanik tamaaniinnarmiittunik nuannarisaqanngitsunit akuttunngitsumik maalaarfigineqartarpoq.
- Uanga aamma eqqakkat uumitsaattarpakka. Suni tamani eqqaaveqarpugut, aammalu neriuutigaarput, paasititsiniaanerup pitsaasup tamatta puiaasanik, pappiaqqanik cigaretikutsinnillu igitsiniarluta eqqaaviit tungaannut ikittunnguanik allortalernissarput nassatariumaaraa, Kim Kielsen oqarpoq.

Juliep meeqqallu tusarnaartitsinissaannut marluusunut tusarnaariarnissaq akeqanngilaq. Nalunaaquttap akunnerata avinnerata missaanik sivisussuseqassapput, aammalu Maniitsumi Nuummilu aaqqissuussinerup tungaanut sapaatit akunnerini allagartarsualersuinikkut nalunaarutigineqassapput.