Tusanaagassarpassuit eqqaallaqqissititsissapput

Qujanaq kampagne ”Qujanaq – Kalaallit Nunaat Paarilluarisiuk”. Nuna tamakkerlugu paasititsiniaanissarsuarmi, ullumikkut aallartittumi oqariartuut taama nipeqarpoq. Paasititsiniaanerup meeqqat inersimasullu eqqaavinnik atuilersissavai. Nunatsinni atuarfinnit tamaneersut erinarsorlutik eqqaanermi pitsaasunik ileqqoqalernissaq anguniassavaat. Aap, allaammi eqqaaviit erinarsortalissapput!

Eqqaaviit erinarsortut arlallit nuna tamakkerlugu angalaartinneqassapput. Igitassamik igitsinitit tamaasa eqqaavik pinngortitaq paarigakku qujalluni erinarsortassaaq.
Paasititsiniaanermut atatillugu Julie Berthelsen erinarsuummik alutorineqartumik nutaamik, eqqaaviup atorneqartarnissaanut aamma Kalaallit Nunaata paarilluarneqarnissaanut tunngasumik immiussivoq. Paasititsiniaaneq tamanut sammitinneqarpoq, kisiannili pingaartumik meeqqat inuussuttullu aallunneqarlutik.
Paasititsiniaanermut ilagitillugu marlunnik tusarnaartitsisoqassaaq, Maniitsumi Nuummilu, taakkunanilu Julie meerarpassuillu erinarsoqatigiit erinarsuut Qujanaq nutaaq tusarnaartitsissutigissavaat. Aamma Avatangiisinut Pinngortitamullu Naalakkersuisoq Kim Kielsen tusarnaartitsinerni marlunni taakkunani peqataanissaminut qilanaarpoq. Tamatuma peqatigisaanik nunatsinni atuarfiit tamarmik erinarsuut issuarlugu pikkorinneqqusaatissapput –10.000 koruuninik pinnassinnaallutik.
Erinarsuut Qujanaq nuna tamakkerlugu radiukkut, tv-kkut aamma Facebook-ikkut nittartakkami ”Qujanaq”-mi tusarnaarneqarsinnaassaaq. Kisiannili aamma erinarsuut nutaaq oqarasuaatinnut sianertaatitut aasinnaavat. Kim Kielsen neriuppoq eqqaaviup atornissaata eqqaamasarnissaanut aamma Kalaallit Nunaata paarilluarnissaanut oqariartuut tusaqqoorneqarlualerumaartoq.
- Meeqqat aallartitatut pitsaanerpaasarput. Meeqqat eqqaavimmik atuisalertissinnaagutsigit, tamatumalu peqatigisaanik inersimasut eqqaavimmik eqqaasittarsinnaagutsigit, eqqakkat aqqusinerni pinngortitamilu alianaatsumi tamaaniinnaq takussaasarnerat pinngitsoortissinnaavarput – Kim Kielsen tusagassiortunik katersortitsinissaq sioqqullugu oqarpoq.
Billedtekst
Tusagassiortut katersortinneqarneranni Kim Kielsenip eqqaavik angisooq, qorsuk erinarsortoq takutippaa, aammalu eqqaaviup atornissaanik Kalaallillu Nunaata paarilluarnissaanik paasititsiniaaneq oqariartuullu pillugit pimoorussisumik oqaluttuarpoq. Tamatuma saniatigut saneqquttut tujuuluaqqanik, arsakoorfinnik kaasarfimmiunik pisiniartaatinillu, Qujanaq-p ilisarnaataanik nutaamik kusanaqisumik ilisarnaatilinnik agguarneqarput.