Naalakkersuisut siulittaasui naapeqatigiipput

Nordisk statsministermøde 2014

Nunani avannarlerni naalakkersuisut siulittaasui ullumikkut marlunngorneq 27. maj Akureyri-mi aasaanerani ataatsimiinniarlutik naapeqatigiipput

Naalakkersuisut Siulittaasuat Aleqa Hammond-ip ullumi Akureyri-mi suleqatini Åland-imeersut aamma Savalimmiuneersut peqatigalugit nunani avannarlerni naalagaaffimmi ministerit ataatsimiinnerannut peqataavoq. Nunani Avannarlerni Siunnersuisooqatigiit præsidentiat aamma Nunani Avannarlerni Ministerit siunnersuisooqatigiiffianni generalsekretæri aamma ataatsimiinnermi peqataapput.

Island-imi naalagaaffimmi ministeri 2014-imi nunani tamalaani suleqatigiinnermi siulittaasutut ataatsimiinnissamut qaaqqusisuuvoq, tassani apeqqutit maannakkut pisunut tunngasut arlallit, nunani avannarlerni oqaluuserisassaniittut oqallisigineqarlutik.

Issittumi Siunnersuisooqatigiinni sulinerup Tromsø-mi allattoqarfimmik pilersitsinermi, apeqqutit amerliartuinnartut oqallisigineqartarlutik, immikkoortumut nutaamut ikaarsaarsimasoq isumaqatigiissutigineqarpoq. Apeqqutit issittumut tunngasut pillugit Nunani avannarlerni suleqatigiinneq, nunat Issittuni Siunnersuisooqatigiinni oqallinnissamut piareersarneranni, nunani avannarlerni nunanut pingaaruteqartunut ilaavoq, tassami nunani avannarlerni suliniutit ataatsimoorussat arlalippassuit pisariillisaaviusumik oqallinnissanut kinaassusersiunngitsumik tunngavissiilluartarmata, taamaalillutillu nunani avannarlerni nunat sunniilluarsinnaanerat pitsaanerulertarluni.

Ataatsimiinnermi iluarisimaarlugu maluginiarneqarpoq suleqatigiinnermut ministerit anguniakkanut nalunaarutaat februaarimeersoq aammalu generalsekretærip Nunani Avannarlerni Ministerit siunnersuisooqatigiivini suleriaatsimik naleqqussaanera, nunani avannarlerni suleqatigiinnermut tunngavissaliilluartut.

Nunani Avannarlerni Ministerit siunnersuisooqatigiivisa saniliminnik suleqateqarnerisa pingaaruteqarnera Naalakkersuisut Siulittaasuata erseqqissarpaa. Ilaatigut pissutigalugu nunani avannarlerni issittumut tunngatillugu suleqatigiinneq tamatumunnga ilaammat, kisiannili aamma pissutigalugu nunani avannarlerni suliassaqarfinni qitiusuni: oqartussaaqataaneq aamma innuttaasunik peqataatitsineq, avatangiisit kiisalu naligiissitaaneq aamma inooqataanermi atugarissaarneq, sanilinik suleqateqarnermi nunarsuarmioqatigiinnut nunani avannarlerni ilusiliineq malunnartinneqartarmat.

Kalaallit Nunaat, Savalimmiut aamma Åland ataatsimoorlutik aamma nunat akornanni suliassaqarfinni attuumassuteqarfiusuni nunani avannarlerni suleqatigiinnermi, tamanna Nunani Avannarlerni Ministerit siunnersuisooqatigiivisa avataanni ingerlanneqaraangat, peqataanissanissamik kissaateqarlutik saqqummiussipput. Assersuutigalugu tassani pineqarsimasinnaapput angallannermut apeqqutinik, atuisartunut apeqqutinik kiisalu kommunimi ingerlatsivimmi ingerlatsinermut tunngasunik oqallinnermut tunngasut, tassani isumassarsiorfiusunik misilittakkanillu paarlaasseqatigiinneq illuatungeriinnut tamaginnut iluaqutaasinnaalluni. Siunnersuuteqarneq naalagaaffimmi ministerinit tigulluarneqarpoq.

Aleqa Hammond ataatsimeereernerup kingorna oqarpoq:

”Piffissaq iluatsillugu Islandimi naalagaaffimmi ministeri qutsavigerusuppara, pissutigalugu aasaanerani ileqquusumik ataatsimiinnerminnut atatillugu naalagaaffimmi ministerit oqaloqatiginissaat pillugu nunat namminersortunit qangalili kissaataasoq piviusunngortimmagu. Tassami naalagaaffimmi ministerit nunani avannarlerni suleqatigiinnermut pingaarnertut akisussaasuupput. Assersuutigalugu Nunani Avannarlerni Ministerit siunnersuisooqatigiivisa sulineranni uagut ulluinnarni peqataanitta takutippaa, siunissami politikkikkut Nunani Avannarlerni Ministerit siunnersuisooqatigiivinut suliakkiisoqaraangat, naalagaaffiit naalakkersuisuinut siulittaasut isumaliutersuuteqarneranni peqataasarnissarput aamma pingaaruteqartoq.

Ullumi ataatsimiinnerup aamma takutippaa Islandimi naalakkersuisut naalagaaffinni naalakkersuisut akornanni nunani avannarlerni oqaloqatigiinnitsinnut atorsinnaasumik ilusiliinermik toraarsisimasut, aammalu qularinngilara aappaagu Danmarkip tamanna malitseqartikkumaaraa, tassani 2015-imi aasaanerani ataatsimiinnermut siulittaasutut tikeraartitsisuusussaagami.”