Narsami atuarfiup isaterneqarnissaa aallartittussanngorpoq

Suliffeqarfiit pingasut Narsami atuarfiup isaternissaannut neqerooruteqarput.

Narsami atuarfiup iluarsartuunneqarnissaanut, ilassutissaatalu sananeqarnissaanut pilersaarutit immikkoortuini siullertut Namminersorlutik Oqartussat 22. maj 2014 avatangiisinut ulorianartunik piianissamut Narsamilu atuarfiup isaternissaanut suliariumannittussarsiuussisoqarpoq.


- Naammagisimaaqalugu paasivara, suliassaq kiisami aallartinneqarsinnaalersoq. Suliap aallartinneqarnissaa amerlasuujulluta utaqqisimavarput, aammalu atuarfissap nutaap sananeqarnissaanut suliariumannittussarsiuussinissamut qilanaalereerpugut, Naalakkersuisoq Siverth K. Heilmann oqarpoq.

Isaterinissaq sioqqullugu atuarfiup illutaata akuutissat avatangiisinut ulorianartut suut akuginerai sukumiisumik misissorneqarput. Taamaattumik isaterinissami aallaqqaammut avatangiisinut ulorianaatilinnik tamanik piiaasoqassaaq, tassani akuutissat avatangiisinut ulorianaatillit tamarmik piiarneqassallutik, isumannaatsumillu eqqarneqassallutik, tamatuma kingorna atuarfiup illutaasa sinneri isaterneqassapput.

Suliffeqarfik Permagreen Grønland A/S akikinnerpaamik neqerooruteqartuuvoq, taannalu isumaqatigiissusiorfigineqassaaq.

Avatangiisinut ulorianartunik piiaaneq atuarfiullu illutaanik isaterineq junip qaammataani aallartissinnaanissaa sulissutigineqarpoq, julip qaammataani 2014 naammassinissaa naatsorsuutigineqarluni.