Avaleraasartoortassat affaat aalisariutit nunatsinneersut aalisassavaat

Fiskefartoej Aalisarnermut, Piniarnermut Nunalerinermullu Aalisarnermut, Piniarnermut Nunalerinermullu Naalakkersuisumut, Finn Karlsenimut, inassuteqarpoq avaleraasartoortassat Tunumi misileraalluni aalisarneqartussat affaat nunatsinni aalisariutinit aalisarneqassasut.

- Avaleraasartoorniarnissaminnut qinnuteqartunit pisassinneqartussatut salliutinneqartut aalisarsinnaasaat tunngavigalugu, inassutigaarput TAC-p 100.000 tonsiusut 52 procentii, 52.000 tonsit nunatsinni namminneerlutik aalisariutaateqartunut pisassiissutigineqassasut, Naalakkersuisoqarfik inassuteqarluni allappoq.

Qinnuteqartunit nunatsinneersut namminneerlutik aalisariutaatillit salliutinneqarput.

Aalisarnermut, Piniarnermut Nunalerinermullu Naalakkersuisoqarfiup avaleraasartoorniarniarluni qinnuteqaatit katillugit 37-t tigusimavai, taakkunanit aqqaneq marluk akuerisaallutik. Qinnuteqartut avaleraasartuut katillugit 300.000 tonsit aalisassallugit qinnutigisimavaat.

Aalisarnermut, Piniarnermut Nunalerinermullu Naalakkersuisoq qaammatit marluk matuma siorna piumasaqarluni erseqqissaavoq avaleraasartoorniarlutik qinnuteqartunit aalisariutit nunatsinneersut salliutinneqassasut.

Taama piumasaqarpoq nunatsinni suliffissat amerlineqarsinnaammata. Piumasaralugulu ingerlatseqatigiiffiit nutaat misileraalluni aalisarnermut peqataatinneqarnissaannut aamma periarfissiissutaassasoq.

Aalisarnermut, Piniarnermut Nunalerinermullu Naalakkersuisoqarfik inassuteqarpoq avaleraasartoortassat 38 procentii qinnuteqartut salliutinneqartut tulliiniittunut pingajuanniittunullu agguaanneqassasut.

Qinnuteqartunit salliutinneqartut tullii tassaapput aalisariutaatileqatigiit Kalaallit Nunaanni angerlarsimaffeqartut namminneq aalisariutaateqartut imaluunniit bare boat aqqutigalugu aalisariummik attartorsimasut (angallat attartugaq inuttaqartinneqanngitsoq), aalisariutaasa aalisarsinnaasaat tunngavigalugit pisassinneqassallutik.

Aalisariutaatileqatigiit aalisariummik aalisariutinilluunniit attartorsinnaapput. Aalisariutit aalisarsinnaasaat tunngavigalugit pisassinneqarsinnaallutik.

Qinnuteqartunit salliutinneqartut tulliisa tullii taassaapput namminneq angallataateqanngitsut. Tassaallutik ingerlatseqatigiiffiit nalunaarsorneqarsimasut, aalisarnermi inatsimmi piumasaqaatinut naammassinnissimasut.

TAC-p 100.000 tonsiusup 10 procentia immikkoortinneqassaaq, ingerlatseqatigiiffinnut aalisarsinnaatitaasunut agguaanneqarsinnaalluni.

- Avaleraasartoorniarnerup nalaani ingerlatseqatigiiffiit aalisarluartut immikkut pisassinneqarsinnaassapput, immikkoortinneqartut 10.000 tonsit aalisarluarnissamut periarfissiissutaassallutik, aalisarnermut, piniarnermut nunalerinermullu naalakkersuisoqarfik erseqqissaavoq.