Nunatsinni naligiissitaanerup ullua 2014

20. maj nunatsinni naligiissitaanerup ullorissagaa Inatsisartut 2010-mi aalajangerpaat tamassuma kingorna ilaatigut naligiissitaaneq pillugu inatsit naligiissitaanermi pitsaasumik ineriartortitsinissamik qulakkeerinninnissamut tapersiisussaq akuerineqarnikuuvoq.

Akuerineqannginnerani pingaartumik suiaassutsit assigiinngitsuni ilaasortassat agguagaanissaat oqallisigineqarnikuuvoq inuiaqatigiilli taamaallaat tamassuminnga isiginiagaqartussaanngillat.

Nick Nielsen oqarpoq, ”Aalajangiisoqaraangat naligiissitaanermut tunngasut tamatta eqqaamasassavagut, tamanna Inatsisartuni, inuussutissarsiutini, meeqqerivinni assigisaannilu aalajangiinerni atuuppoq. Naligiissitaaneq suiaassutsit ataatsimoorfinni assigiinngitsuni agguagaanerannit annertuneruvoq – naligiissitaaneq tassaavoq inuunermi tamani assigiinngiiaassuseq, naligiinneq ataqqinninnerlu”.

Naligiissitaanermi qangalili arnat qinersisarnissaannik, assigiimmik akissarsiaqarnissamik piumasaqaateqarnermik pineqartarnikuuvoq. Ullumikkulli naligiissitaanermi pineqarpoq angutit arnallu pisinnaatitaaffii.

”Naligiissitaanermi pineqanngilaq suiaassutsit aappaannut inissaqartitsiniarluni suiaassutsit aappaata piiaaffigineqarnissaa. Inuiaqatigiinni naligiimmik atugassaqarluni peqataanissamut kikkut tamarmik periarfissaqarput. Suiaassutsit inuit ataasiakkaat ineriartornissaannut periarfissaannullu killiliissanngillat. Assigiinngiiaassuseq nakuussutaavoq, taamaammallu inissaqartitsinissaq kikkut tamarmik ineriartorsinnaanissaat tamassumalu inuiaqatigiit nukittorsarnissaat pingaaruteqarpoq”, Naalakkersuisoq Nick Nielsen naggasiivoq.