Nunaqarfinnut oqartussaaneq annerusoq

Namminersorlutik Oqartussat, kommunit KANUKOKA-lu 2014-imi ulluni majip 23-aniit 25-ianut nunaqarfiit pillugit ataatsimeersuarnermut peqataapput.

Aningaasaqarnermut Nunamullu namminermut Naalakkersuisoq Vittus Qujaukitsoq ima oqaaseqarpoq:

”Nunaqarfiit ineriartortuarnissaat naalakkersuisunit, inuiaqatigiinnillu tamanit pingaartinneqarpoq. Ataatsimeersuarnermut pissanganarluinnartumut peqataavugut, nunattalu ineriartornerata ingerlanneqarnissaa pillugu oqallilluta.

Nunaqarfiit illoqarfiillu mikinerit arlallit ukiuni kingullerni tikeraarsimavakka. Nunatsinni isorartoqisumi periarfissat ajornartorsiutillu ulluinnarni atukkagut takujumallugit innuttaasunillu toqqaannartumik nammineerlunga tamakku pillugit oqalliseqateqarumallunga taamak iliorpunga. Tikeraartarninni tikilluaqqusaaneq oqallikkumassuserlu annertuut pillugit qujarusuppunga. Tikeraartarnikka paasissutissanik annertuunik ilisimasaqarnerulernermillu pissarsiffigaakka. Paasisallu tamakku Naalakkersuisuni suleqatinnut aamma tunniussimavakka.

Ajoraluartumik tikeraartarninni arlalissuarni, inuunermik pitsaasumik imartuumillu nunaqarfiit sinaakkusiinerisa attatiinnarnissaat isumannaarniarlugu nammineerluni ineriartortitsinermik aallartitsinissaq pillugu kommuninut oqaloqatigiinninissamut periarfissat maqaasineqarsimasut, amerlasuutigut paasitinneqartarsimavunga. Najukkami ingerlatsinermut ineriartortitsinermillu pilersitsinissamut piginnaatitaaffilerneqarnnissaq aningaasaliiffigineqarnissarlu nunaqarfinni aqutsisunit maqaasineqarpoq. Tamanna isumannartutut isigaara.
Innuttaasunit uummaarissunit suliffeqarfinnillu nappanneqarsinnaasunit nunap siunissaa pilersinneqassaaq. Nunaqarfiit aqunneqarnikkut sinaakkutissat pissusissamisoorput! Nunaqarfinni innuttaasut sapinngisamik annertunerpaamik nunaqarfigisamik ineriartornissaannik periarfissillugit oqartussaaffilerlugillu kommunit timitalimmik sulissuteqarnissaat maanna piffissanngorpoq. Timitalimmik akisussaaffiliinissaq pingaaruteqarpoq, aalajangiinerillu piviusunngortinnissaannut aningaasanik malitseqartitsinissaq taamatuttaaq pingaaruteqarpoq.”