Kollegiaqarnermik aaqqissuusseqqiinneq

”Siunertaanngilluinnarpoq inuusuttut ilinniagaqarnermi saniatigut suliffeqarusuttut pillarneqarnissaat. Ilinniagaqartut ataasiakkaat namminneq aalajangissavaat ilinniagaqarnerup suliffeqarnerullu iluini qanoq piffissamik atuiniarnerlutik. Kisianni pissutsit assigiinngitsut maanna aaqqissuussinermi atuuttut aaqqiivigisariaqartut uagut Naalakkersuisuni isumaqarpugut.

Ilinniagaqartut ullumikkut ilaqarput ilinniakkami saniatigut suliffeqarnermikkut ukiumut qaffasissorujussuarnik aningaasarsiaqartartunik, aningaasarsiallu taakkua assersuutigalugu SIK-p isumaqatigiissutaani minnerpaamik akissarsiaasinnaasunit qaffasinnerujussuusarput. Ilinniagaqartullu taakkorpiaat tamatuma saniatigut inersimasumut ataatsimut qaammammut ineqarnermut 850 kr.-inik akiliuteqarsinnaasarlutik, naak pisortat inissiaataanni ineqartut taakkunannga annertunerujussuarnik akiliuteqartinneqartartut, ilaatigut naak kollegiani inissiaatit pisortallu attartortittagaanni inissiaatit pitsaassutsimikkut assigiissinnaasaraluartut. Taamaattuminguna suliat ingerlatseqqinneranni siunnerfiginiaripput ineqarnermut akiliutigineqartut inoqutigiit isertitaannut naapertuuttumik annertussusilerneqartalernissaat.”

Naalakkersuisoq Nick Nielsen oqarpoq, ILI ILI-llu siulittaasua Kikkik Olsen ingerlaqqilluni oqarpoq:

”Ilinniartitaanernut periusissiap aamma Ilinniartitaanermi pilersaarut II-p suliarineqarneranut atatillugu Naalakkersuisunik oqaloqateqartarsimanerput nuannaarutigaarput, tassami piumassuseqarluta suliani ilusilersueqataagatta. Naalakkersuisut uagutsinnit ilinniagaqartuusunit tusagaqarnissartik soqutigisimavaat, siunnersuutillu tunniussagut sulianut ilaalersissimallugit.

Kollegiani ineqarnermut atatillugu siunnerfiuvoq ineqarnermut akiliutit qaffaavigineqarnissaat, ilinniarnermi saniatigut qaffasissunik isertitaqartartut eqqarsaatigalugit. Isertitanut killiliussassat suli aalajangersaavigineqanngillat, soorunalumi naatsorsuutigaarput suliami tassani aamma tusaaniarneqarumaarluta.

Nuannaarutigaarput tusaratsigu Naalakkersuisut sulissutiginiaraat ilinniagaqarnersiutit siunissami ukiumoortumik akit qaffakkiartornerannut malinnaatinneqartalernissaat, aammalu aningaasanik attartorsinnaanermut periarfissat pitsaanerulersinneqarnissaat ataatsimut tulleriiaarinermi ilaatinneqarumaartut.”

Siulittaasoq Kikkik Olsen-ilu naggasiilluni oqarpoq; ”Ilinniagaqartunut ataatsimut isigalugu atugassarititaasut ajorseriartinneqanngippata, illuatungaatigulli pitsaanerulersinneqarlutik, ILI ILI iluarisimaarinnippoq. Tamatumunngalu tunngatillugu qularutissaqanngitsugut oqaatigineqarpoq.”

ILI ILI Ilinniartitaanermut Naalakkersuisumut Nick Nielsen-imut isumaqatigiissuteqarpoq Ilinniartitaanernut periusissiaq aamma Ilinniartitaanernut pilersaarut II Ilimmarfimmi maajip ulluisa 19-ianni nal: 16:00 saqqummiunneqassasoq oqallisigineqarlunilu. Ilinniagaqartut tamaasa kaammattorumavagut aggerlutik oqallinnermut peqataajartoqqullugit.”

Iluarsaaqqinnermut atatillugu sulineq 2016-imi aningaasanut inatsisissap suliarineqarnissaa tikillugu ingerlanneqassaaq, taamaattumillu piffissaqarluarpugut ataatsimoorluta ilinniagaqarnersiuteqarnermut ilinniartunullu kollegiani inissiaatinut atatillugu ilutsinik naleqquttunik aaqqissuussinissatsinnut.