Danmark-imut naapertuutinngitsumik nuuttoqartarneranik pinaveersaartitsiniarneq

Namminersorlutik Oqartussani Ilaqutariinnermut Inatsisinillu Atuutsitsinermut Naalakkersuisoqarfiup Danmark-imut naapertuutinngitsumik nuuttoqartarneranik pinaveersaartitsineq pillugu Danmark-imi Kalaallit Illui suleqatigilerpai.

Kalaallit pilersaarusiugaanngitsumik Danmark-imut nuuttut nuunnerminnut atatillugu annerpaamik ajornartorsiuteqarnerusarput Danmark-imilu pitsaanngitsunik atuagassaqartitaasarlutik.

Danmark-imut nuunnissaq isumaliutigigaanni, pissutsit eqqarsaatigilluagassat pillugit ilisimatitsinissaq quppersakkami matumani siunertaavoq. Tamassuma saniatigut Danmark-imut aallarnissaq sioqqullugu pissutsit iluarsissallugit pingaaruteqartut ilisimatitsissutigineqarput. Pissutsit tamakku pingaartumik tassaapput najugassaqarnissaq, pilersornissamut tunngaviusut, suliffeqarneq, kulturi ilisarisimasallu.

Ineqarnermut, suliffeqarnermut, ilinniagaqarnikkut piumasaqaatinut, siusinaartumik pensionisiaqarnermut il.il. tunngatillugu allaanerusumik malittarisassaqartoqarnera ilisimanagu Danmark-imut nuuttartut ukiuni kingullerni amerlanerupput. Tamatuma saniatigut ilisarisimasaqalerniarneq ajornartorsiutaasinnaasarpoq tamannalu ilaqutariit Danmark-imut nuuttut akornanni kiserliorneq atugaalersinnaasarluni. 

Quppersagaq Nunatsinni tamarmi agguaanneqassaaq.

www.sullissivik.gl-imi Danmark-imut nuuttarneq pillugu paasissutissat amerlanerusut pissarsiarisinnaavatit. Tassani nuunnissannut suut eqqumaffigisariaqarnerlugit paasisaqarnerusinnaavutit.

Tamatuma saniatigut kalaallit illuisa internetikkut nittartagaanni paasissutissarsiorsinnaavutit taamatullu aamma www.udsattegroenlaendere.dk-i paasissutissanik pissarsisinnaallutit.
www.borger.dk-mi pensionisianut tunngatillugu malittarisassat, pisortanit ikiorsiissutit, Nem ID il.il. atorlugit inuit najugaasa allattorsimaffiannut nalunaarneq meeqqamillu atuarfimmut, kiisalu ulloq unnuarlu paaqqinniffimmut allatsitsineq pillugit paasisaqarnerusinnaavutit.