Inuussutissarsiutit aamma isumalluutit uumassusillit

Nunaqarfimmiut ataatsimeersuarneranni ullut aappassaanni nunaqarfinni isorliunerusunilu inuussutissarsiornikkut ineriartortitsinissamut periarfissat sammineqarput.

Royal Greenlandimit nunaqarfinni tunitsiveqarnikkut ingerlatsineq aamma tunitsiviliornerit pillugit killiffimmik saqqummiunneqarput. nunaqarfinnilu tunitsiveqarniarnikkut piumsaqaatit aningaasartuutillu immikkut tassani aamma itisilerneqarput. Aalisarnermut Piniarnermut Nunalerinermullu Naalakkersuisoqarfimmit tikkuarneqaproq, pisanik pitsaanerpaamik suliarinninneq aamma tunisassiorneq, nunami aamma avammut tuniniaanermi akigissaartitsinissamut pingaaruteqarluinnartuusut.

Naalakkersuisut eqqiluisaarnermik aamma nakkutilliisarnermik immikkoortukkaarlugit pikkorissaasarnernik neqerooruteqartarnerit amerlisarniarpaat. Aalisarnermiit tunisassiornermut nerisassanik tunisassiortutut allagartaqalersitsinissaq anguniarneqarpoq.

Nunaqarfimmiut isorliunerusuneersullu ataatsimut oqallinnerni pitsaasumik nerisassanik tunisassiornermi pikkorissaasarnerit aamma ilisimasanik piorsaasarnissat nunaqarfinni tunitsiveqarnikkut ineriartortitsiniarnermi pingaaruteqartut oqariartuutigaat. Allat oqarput, saniatigut aalisakkat pisarineqartartut, tunineqarsinnaanngitsutut nalilerneqarneri pissutigalugit eqqarneqaannartartut pinaveersaartinneqartariaqartut. Tamannalu pisarineqartartunik pitsaanerusumik atorluaanissamut aamma nunaqarfinni tunitsiveqarnikkut pitsanngorsaanissamut kiisalu attaveeqaatit pisariaqartinneqartut pillugit nutaamik eqqarsartoqartariaqalernera pisariaqartoq.

Ineriartortitsinissamut ataatsimeersuartitsinermi saqqummiunneqartussat ullut aappassaanni tassapput inuussutissarsiornikkut suliniutit allaanerusut. Tassani sammineqarpoq, Ilimanami takornariaqarnikkut suliniut aningaasanik katillugit 40 millioningajannik aningaasaliiffigineqartoq. Suliniummi illut eqqissisimatitat marluk nutarterneqassapput, taakkualu neriniartarfissatut ataatsimiittarfissatullu ilusilerneqassallutik, saqqummersitsivittut, pisiniarfittut aamma tunitsivittut atorneqarsinnaajumaarlutik. Taakku saniatigut takornarianut illuaqqat 15it sananeqassapput. Suliniut assersuutissatsialaavoq pisortat namminersortullu suleqatigiinnerisigut, kulturikkut kingornussat inuussutissarsiornikkut ineriartortitsinikkut atorneqarluarneqarsinnaanerinut.

Isumaginninnikkut, peqqinnikkut aamma avatangiisit nunaqarfinni atorneqartut ualiinerani oqallisigineqassaput. Inuunerinnerup attanneqaannarnissaa anguneqassappat, nunaqarfiit najoruminartuunissaat aamma suliffissaqarfiusinnaanissaat pisariaqarpoq.