Ataatsimeersuarneq aallartilluarpoq

Bygdekonference

Inoqarfiit minnerit ineriartortinniarlugit ataatsimeersuarneq aallartilluarpoq

Ilulissani ulluni maajip 23anniit maajip 25annut nunaqarfiit aamma nunatsinni kommunenilu politikkerit naapoipput. 150init amerlanerusut Ilulissanut ataatsimiigiarlutik tikipput, tassanilu pisussatut pilersaarut nunatssinni nunaqarfiit ineriartortinneqarnissaannut tunngasunik imaqarluartoq oqallisigissavaat.

” Naalakkersuisoqatigiinnermi isumaqatigiissummi qitiulluinnarpoq, nuna ataatsimut isigalugu ineriartortinneqassasoq. Taamaattumik naalakkersuisunit pingaartinneqarpoq nunaqarfiit sinnissaat katersorlugit naapisinneqassasut, tassanilu nunaqarfinni nukittoqutit aamma atukkat sammineqassallutik”, Jens-Erik Kirkegaard oqarpoq nangillunilu, ”Naalakkersuisut suliniutinik immikkut ittunik ukiumi matumani aallarnisagaqalereerput, taakkulu nunaqarfinnut isorliunerusunullu sammisuupput. Pingaaruteqarpoq aningaasat kommunit aamma nunaqarfiit peqatigalugit pingaarnersiorneqarnissaat, taakkumi inoqarfinni ataasiakkaani pissutsinik ilisimasaqarluarnerpaajupput.”

Ataatsimeersuarnerup ulluisa siullersaanni Kalaallit Nunaanni aningaasaqarnikkut ineriartorneq sammineqarpoq aamma kommunit aamma nunaqarfiit inoqarfiit pillugit siunissamut takorluugaat saqqummiunneqarput.

Aningaasaqarnermut Nunamullu Namminermut Naalakkersuisup Vittus Qujaukitsoq aamma Aningaasaqarnermut Siunnersuisoqatigiinneersoq Ulla Lynge inuiaqatigiit amerlassutsimikkut ilusaata allanngoriartornerata sunniutai pillugit tikkuagaqarput, inuiaqatigiinni utoqqaat sulisinnaassunut sanilliullugit amerlanerummata aamma illoqarfinnut anginerusunut eqiteruttoqarnera. Inuussutissarsiutit nutaat ineriartortinneqarnissaat aamma nuna tamakkerlugu ilinniartitaanikkut annertusaanissaq pisariaqartinneqartoq oqariartuutaavoq.

Kåre Hendriksenip Artekimeersup nunaqarfinni siunissami periarfissat pillugit ilisimatusarluni misissuinermini inerniliussimasani saqqummiuppai. Pingaarnertut inerniuliussaraa, pingaaruteqartoq sumiiffimmi inuussutissarsiornikkut ineriartortinneqarsinnaasut sammissallugit, akerlianik isiginiarpallaarnagu inoqarfik nunaqarfittut imaluunniit illoqarfittut inissisimanersoq.

Nunaqarfiit sinniisuisa ullumi siullermi nunaqarfinni ineriartortitsinissamut takorluukkatik saqqummiuppat. Inuiaqatigiit pilersitaat soorlu kiffartuussinermik isumaqatigiissutit naapertorlugit sullinneqarneq, attaveqatigiinneq aamma kulturikkut atukkat ilinniarsimasunik sulisoqarnissamut pingaaruteqartut saqqummiupppaat.