Ilinniartitaaneq aamma Suliffeqarneq

Nunaqarfinni isorliunerusunilu suliffissaaleqinermut suliniut ataatsimeersuarnerup ulluisa kingullersaanni sammineqarput.

Suliffissaaleqisunut piaartumik suliniutit aamma ungasinnerusumik isigaluni suliniutit Inuussutissarsiornermut Aatsitassanullu Naalakkersuisumit Jens Erik Kirkegaardimit saqqummiuneqarput. Maannakkoqqissaaq iluarsartuussinermut, aserfallatsaaliuinermut aamma sanaartornermut suliassat siuartinneqartut 174 millionit kronenik naleqarput. Nunaqarfiit aningaasaliissutinit taakkunannga 50 millionit kronenik immikkoortitsiffigineqarput.

Suliffissaaleqisut ukioq 2017 nallertinnagu affaannanngortinneqarnissaat anguniagaavoq. Inuusuttut suliffissaaleqisut immikkut iliuuseqarfigineqartussaapput. Inuusuttut 29-t inorlugit ukiullit suliffissaaleqisutut kisitsisini amerlanerussuteqarput, inuusuttullu eqimattaapput immikkut eqqorneqarnerluttut. Ilinnialeqqinnissaat suliffeqalernissaallu anguniarlugu pitsaanerusumik suliniuteqarfigineqartariaqartut siunnersuutigineqarpoq, Piareersarfiit taakkununnga neqeroorutigisartagaanni inissat 100nik ukiuni 2015-imi ilaneqassapput. 2016-imi 250-inik inissanik ilallugit aamma 2017-imi 2018-imilu 400-nik ilaneqassallutik.

Iliuusissaq pingaaruteqartoq alla tassaavoq nuna tamakkerlugu nittartakkakkut suliffissarsiuussisarfik, taamaattumik pilersitsinikkut suliffeqarnermut tunngasuni aporfissat anginerit qaangerniarneqassapput. Naalakkersuisunit suliffissaqarfiusunut nuttarnerulernissamut aningaasaliissutit ajornannginnerusumik pissarsiarineqarsinnaalersinniarlugit inatsisissatut siunnersuutigineqartoq aamma taaneqarpoq.

Nunaqarfinni suliffissaaleqinermi ajornartorsiutaasut assigiinngitsut KANUNUPEp siulittaasuata Jens Kristian Therkelsenip oqaatigaai. Ukiup qanoq ilinera aallaavigalugu suliffissaaleqisarneq aamma eqimattat sivisuumik suliffissaaleqisuusimasut. Qujanartumik alimasissumik ilinniartitsisinnaanermut atortut nutaat periarfissaalersimapput, pikkorissaanermut atorneqarsinnaallutik, nunaqarfimmiunullu tamakku piukkunnaateqartut. Suliffissaaleqisunut iliuusissat nutaat Jens Kristian Therkilsenimit tigulluarneqarput.

Ilinniartitaanermi aamma immikkut ittumik suliniutit aallartinneqartut ataatsimeersuarnermi sammineqarput. Ilinniartitaanermut Naalakkersuisup Nick Nielsenip saqqummiussinermini suleqatigiinnissap pingaarutaa oqariartuutigaa, meeqqanik inuusuttunillu sullissinermi peqataatitsineq aamma ataatsimut pingaartitaqarnissaq pingaaruteqartut.

Nuikip suliniutaa nunaqarfinnut immikkut toqqarneqartunut suliniutaavoq, taannalu aqqutigalugu inusuuttut amerlasuut ilinniartinneqartarput, ukiullu ataatsip qaangiunnerani meeqqat atuarfianni soraarummeerluni misilitsissutit misilitsiffigineqartarlutik. Inuusuttullu ilinniagaqalernissaminnut periarfissaat taamatut ammaanneqartarput. Suliniummi pitsaasumik angusaqartoqarpoq, naammassisartullu amerlapput.

Ualimut suleqatigiikkuutaani anguniakkat sammineqassapput, eqimattani sukat simasat ataatsimeersuarnermi sammineqartut aallaavigalugit iliuusissatut innersuussusiussapput, ukuusuni
1. Inoqarfinni minnerusuni anguniakkat
2. Inuussutissarsiutit isumalluutillu uumassusillit
3. Isumaginninneq, peqqissuseq aamma avatangiisit
4. Ilinniartitaaneq aamma suliffeqaneq

Ataatsimeersuarnerup kingorna suliassanik malinnaasussanik suleqatigiissitanik toqqaasoqassaaq, tassani Naalakkersuisunit, KANUKOKAmit aamma KANUNUPEmit peqataasoqassaaq, pingaarnerusutullu sammisani suliniutissanik qaammatini aggersuni suliaqassapput