Avatangiisini eqqiluisaarneruneq amerlanerusunik suliffissaqartitsiviulissaaq

Ukioq manna immikkut issumik aningaasaliissutit 44,5 mio. koruuniusut eqqaavissuarni 6-ini saliinermut aamma nuna tamakkerlugu anertarfilerinermut eqqaaveqarfinnut nutaanut atorneqassapput. Tamanna malugineqarsinnaasumik avatangiisini pitsaanerulersitsissaaq aammalu najukkani suliffissaqartitsiniarnermut iluaqutaassalluni.

Nunatta annersaani pitsaasunik eqqaaveqarfeqarnissaq amigaataavoq, anartarfilerinerup aamma eqqaavissuaqarnerup iluanni.

Eqqaavissuit amerlanerpaartaat avatangiisinut akuersissummik peqarfiunngitsumik ingerlanneqarput, tamannalu putsup akornusersuisarneratigut, pissutsit eqqiluitsuunnginneranni aamma illoqarfiit nunaqarfiillu eqqaanni immap mingutsinneqartarneratigut, avatangiisinut peqqinnissamullu sunniuteqarnerluttarpoq.

Nunaqarfinni aamma anartarfilerinermi imerpalasunik imaluunniit poorsuarni eqqaavissuarnut, eqqagassanut allanut ilanngullugit igitsisoqartarpoq. Tamanna eqqiluisaannginneruvoq aammalu nappaatinik siaruartitsinissamik aarlerinartortaqarluni.

”Kommunit maannakkut avatangiisini pissutsinik pitsanngorsaanissamut ikiorneqartussanngorput, peqatigisaanillu nutaanik suliffissaqartitsisoqalissalluni” oqarpoq Naalakkersuisoq Kim Kielsen. ”Suliffissaqartitsiniarnerup annertunerulersinnissaanut suliniuteqarnerup Kalaallit Nunaani sumiiffinni tamaginni avatangiisinik pitsanngorsaanissamut ataqatigiissinneqarnissaa Naalakkersuisunut aalajangiisuulluinnartumik pingaaruteqarsimavoq. Aamma najukkani avatangiisini suliffissaqartitsiniarnermilu pitsanngorsaanissamut pisariaqartitsiviunerpaajusuni”.

Eqqaavissuarni avatangiisinut akuersissuteqarfigineqarsinnaanissaannut saliineq aamma Paamiuni, Qaqortumi, Maniitsumi, Upernavimmi, Narsami aamma Kangerlussuarmi ingerlanneqassaaq. Suliaqarnissamut tassunga katillugit 12,5 mio. koruunit immikkoortinneqarput.

Anartarfilerinermut eqqaaveqarfiit 32 mio. koruuninik sinaakkutissaqartillugit pingaarnersiuinermi salliutinneqassapput. Inoqarfimmut ataatsimut 500.000 koruunit missingersuutigineqarput. Anartarfilerinermut eqqaaveqarfiit kommunit 2014 naatinnagu inatsisit malillugit pisussaaffiusumik anartarfikunik aamma uffarfinnit, anartarfinnit, igaffimmillu imikunik eqqaasarfissanik pilersitsisinnaalernissaannut ikiuutaassapput.

Suliniut taanna Naalakkersuisut ukioq manna suliffissaaleqisut ikilisinniarlugit suliniutaasa ilagaat.