Aatsitassarsiornermut suliassaqarfimmut suliffeqarfiit piginnaanngorsarnissaannut suliaqartussaq nutaaq

Suliffeqarfiit nunaqavissunit pigineqartut aatsitassarsiornermut suliassaqarfimmut pilersuisunut pilersuisuunissamik kissaateqartut nukittorsarneqarnissaat Naalakkersuisut kissaatigaat. Suliassat suliffeqarfinnit nunaqavissunit pigineqartunit kivinneqarsinnaasut amerliartortillugit, suliffissat amerlanerulissapput aamma aningaasaqarnerup siuariartornera annertunerulersinneqassalluni.
Taamaattumik Naalakkersuisut 2012-imili suliffeqarfinnik piginnaanngorsaanissamut aningaasassanik immikkoortitsipput, taamaalillutik taakkua aatsitassarsiornermik suliaqartut siunissami pilersuisussaminnut piumasaqaataannik naammassinnissinnaalersinnaassallutik.

Naalakkersuisut suliffeqarfimmut nunaqavissunit pigineqartumut Greenland Petroleum Services-imut, neqeroortitsinermi ajugaasumut, isumaqatigiissut nutaaq atsioqqammerpaat. Taakku ukiuni marlunni tulliuttuni Rambøll Kalaallit Nunaata piginnaanngorsaalluni suliarisimasaanik nangitsillutik suliaqassapput. Piffissami siusinnerusukkut isumaqatigiissuteqarfiusumi nunatsinni suliffeqarfiit sammisani suliffeqarfimmi isumannaallisaanermiit isumaqatiginninniariaatsinut aamma tulluartussarsiuussisarnermut tunngasuni siunnersorneqarput.

Inuussutissarsiornermut, Aatsitassaqarnermut Suliffeqarnermullu Naalakkersuisoqarfik Nuummi Greenland Business suleqatigalugu kommuneni inuussutissarsiornermut siunnersortinik ulluni tulliuttuni pikkorissaassaaq. Pikkorissaanerup ilaani pikkorissaanermut pisussanut pilersaarut Greenland Petroleum Services-ip aallartitaanit sukumiisumik saqqummiunneqassaaq.

”Greenland Petroleum Services-imik, najukkamiititsinissamik aamma ilisimasanik nuussinissamik qulakkeerinissamik pingaartitsisumik ukiuni tulliuttuni marlunni suleqateqarnissaq qilanaaraarput. Taamaalilluta najukkani inuussutissarsiornermi ineriartortitsinermut immikkoortortat piginnaanngorsaanermik suliniuteqarnermi ilaatinneqarnissaat qulakkiissavarput”, Inuussutissarsiornermut Aatsitassanullu Naalakkersuisoq Jens-Erik Kirkegaard oqarpoq.

Greenland Petroleum Services ukiuni tulliuttuni marlunni nunatsinni suliffeqarfinnut pikkorissaanernik siunnerfeqartunik neqerooruteqassaaq.