Inatsisitigut ataataqanngitsut

Aleqa Hammondip apriilip 25-anniit maajip aappaannut annerusumik inatsisitigut ataataqanngitsut sammiartorlugit Danmarkimiinnera pillugu.

”Neriulluarnera pigiinnarpara sulilu neriuutigalugu inatsisitigut ataataqanngitsut taarsiivigineqarnissaat pillugu oqaloqatigiinneq aqqutissiuunneqarumaartoq”, taama oqarpoq Naalakkersuisut siulittaasuat Aleqa Hammond, nangillunilu: ”Inatsisilerineq eqqarsaatigalugu pisariusariaqanngikkaluarpoq. Thulemi sulisartuusimasut Uummannamiillu pinngitsaalisaallutik nuutsitaanikut Danmarkimiit aningaasatigut siornatigut taarsiivigineqarnikuupput”.

Aleqa Hammond nangeqqippoq: ”Ataatsimeeqateqarsimanerpassuakka oqalliseqateqarsimanerpassuakkalu inatsisitigut ataataqanngitsut ajornartorsiutaannut aaqqiissutissamik pilersitsisimanngillat. Kisianni Folketingip Nunarput pillugu ataatsimiititaliaat ataatsimeqatigereerikkalu taakku nalunaarput inatsisissatut siunnersuutissiap aappassaaneerneqarnissaanut isumaliutissiissutigineqarnissaa kinguartinneqassasoq, tassami ataatsimiititaliap statsministeri itisiliivigeqqulersaarmagu sooq uanga ujartuinera naapertorlugu statsministeri naalakkersuisullu inatsisitigut ataataqanngitsut pillugit oqaloqateqarumannginnersoq”.

Aleqa Hammondilu itisiliivoq: ”Københavnimi ataatsimeeqateqarninni tamani inatsisitigut ataataqanngitsut pillugit kalaallit isumaat saqqummiuttarpakka. Taakkununnga ilaatillugu kalaallit nuannaarutigigaat inatsisissatut siunnersuutip akuerineqarnera periarfissiissammat inatsisitigut ataataqalernissaq, ataataasullu aqqa atulersinnaalernissaa kingornussarsiffiginissaalu, ataataasoq suli uumassappat”.

”Aammattaaq taakkartorpara inatsisitigut siunnersuut akuerineqaraluarpalluunniit suli inatsisitigut ataataqanngitsoqartoq kingornussisinnaatitaanngitsunik ataataasoq toqoreersimammat kingornussarsiallu kingornussisussanut agguaanneqareersimammata. Taamaalilluni inoqalissaaq ikinnerussuteqartunik. Kalaallit tungaanninngaanniit kissaatigineqanngilaq toqoreersut pigisaannut tunngasut suliat matuneqareersimasut ammaqqinneqassasut. Kingornussarsereersimasunut innimisunneq tassani annertuumik pissutaavoq. Inatsisissatut siunnersuutip taamatut isikkoqartillugu akuerineqarnissaa kalaallinit kissaatigineqarpoq. Kisianni danskit naalakkersuisui politikkikkut inatsisitigut ataataqanngitsut ukiuni ingerlasuni amerlerujussuarsimanerannut annertuumik akisussaaffeqarput. Tamannaana pissutigalugu arlaleriarlunga statsministeri oqaloqatiginiartarsimagiga inatsisitigut ataataqanngitsut amiakkuusut taarsiivigineqarnissaat pillugu”, Aleqa Hammond naggasiivoq.


Naalakkersuisut siulittaasuata Aleqa Hammondip tamanna ilisimatitsissutigaa apriilip 25-anniit maajip aappaannut Folketingimi statsministerip naalagaaffeqatigiinneq inatsisitigullu ataataqanngitsut pillugit sammisamut tunngasuni saqqummiinissaanut tunngatillugu Københavnimeereernermi kingorna.

Siulittaasoq inatsisitigut ataataqanngitsut pillugit Københavnimi tusagassiortunik katersortitsivoq apriilip 28-anni 2014-imi, tassanilu peqataapput Statsministeriamiit sinniisut Folketingillu Nunarput pillugu ataatsimiititaliaa. Aqaguani Naalakkersuisut siulittaasuata Venstrep siulittaasua Lars Løkke Rasmussen ataatsimeeqatigaa, taamatuttaaq Justitsminister Karen Hækkerup, tamatumalu kingorna Siulittaasup Folketingimi naalagaaffeqatigiinneq pillugu oqallinneq akunnernik tallimanik sivisussuseqartoq najuuffigaa.

Naggataatiguttaaq Siulittaasup apriilip 30-anni Folketingip Nunarput pillugu ataatsimiititaliaa ataatsimeeqatigaa Folketingillu Siulittaasua Mogens Lykketoft.


Aammattaaq Siulittaasup nunanut allanut tunngasunut ministeri Martin Lidegaard aamma japanimiut nunanut allanut tunngassutilinni ministeri qulequttat allat pillugit ataatsimeeqatigisimavai.

Annertunerusumik apeqquteqartoqassappat akineqarsinnaapput uunga saaffiginnittoqarneratigut inatsisit pillugit pisortaq Kim Blokbo, mobil +299 548878/+45 40178293.