Sulinissamut aamma nunamiinnissamut akuersissutit ikiliartorput

Inuussutissarsiornermut, Aatsitassaqarnermut Suliffeqarnermullu Naalakkersuisoqarfik ilaatigut Kalaallit Nunaanni Sulisitsisut Peqatigiiffiat suleqatigalugu, ukiuni kingulliunerusuni nunanit allamiunut suliassaqarfimmi itinerusumik sunniuteqarluarnerulersitsiniarluni sulissuteqarpoq.

Siunertaavoq allaffissornerup, ajornartinnagu nunaqavissunik sulisussarsiniartarnissamik tunngavissiisussap, peqatigisaanillu nunaqavissunik sulisussarsisoqarsinnaanngikkaagat suleriaasissanik eqaatsunik pilersitsisussap sunniuteqarluarnerulersinnissaa.

Nunanit allamiunut suliassaqarfik Naalakkersuisut suliffissaqartitsiniarnermut periusissiaanni ilaatinneqarpoq, taassumalu aamma imarai nunami namminermi suliffissanut nittartagaq, sulisussarsiortarnerinnarmik ajornannginnerulersitsisussaq, ukiuni aggersuni inuusuttut suliffissaaleqisut ikilisinnissaannut Piareersarfinni inuusuttunik amerlanerusunik tigusisarnissaq aammalu sulianut piginnaaneqarnernik kivitsinissamut allanullu suliniutinut pingaaruteqartunut siunissami nunaqavissunik sulisussanik atorfinitsitsisarnerup qulakkeerneqarnissaanut amerlanerusunik aningaasassaqalernissaq.

Suleriaatsit sunniuteqarluarnerusut nutaat malitsigisaannik sulinissamut nunamiinnissamullu akuersissutit akuersaartumik akineqartartut ukiut tamaasa ikiliartorput: 2011-imi inuit 169-it sulinissamut nunamiinnissamullu imaluunniit Kalaallit Nunaanni ilaqutariinnik/aapparisamik ataatsimoortitsilernissamut akuersissummik tunineqarput. 2012-imi amerlassusaat 147-uuvoq aammalu 2013 amerlassusaat 131-iulluni.

2013-imi akuersaartumik akineqartunit taakkunani 131-init katillugit 100-it ukioq ataaseq sulinissamut akuersissutaapput, 26-it ilaqutariinnik/aapparisamik ataatsimoortitsilernerullutik aammalu 5-it ilinniartunut nunamiinnissamut akuersissutaallutik. Sulinissamut akuersissut immikkut ilinniagaqarsimasunut (1/3-del miss.) aamma ilinniagaqarsimanngitsunut (2/3-dele miss.) tunniunneqartarpoq. Tassalu 2013-imi nunatsinni kommunini tamani ilinniagaqarsimanngitsutut sulisussanut ukiumi ataatsimi sulinissamut akuersissutit 66-it missaat tunniunneqarput.

”Kisitsisit appasipput, inuussutissarsiorneq nuna tamakkerlugu ingerlalluassappat appasinnerulersinnaanavianngitsut”, oqarpoq Karsten Klausen Kalaallit Nunaanni Sulisitsisut Peqatigiiffianneersoq. Peqatigisaanik suliaqarneq suliassaqarfimmi suleriaatsinik pisariillisaalluni aammalu suliassanik suliarinnittarnermik sukkanerulersitsinissamut ingerlanneqartoq naammagisimaarnerarlugu oqaatigaa.

”Kisitsisit nunanit allanit ilisimaneqartunit maannakkut annikinnerungaatsiarput, tamannalu naammagisimaarpara” oqarpoq Inuussutissarsiornermut Aatsitassanullu Naalakkersuisoq, Jens-Erik Kirkegaard. ”Siunnerfipput tulleq tassaavoq nuna tamakkerlugu Suliffissanut nittartakkami sulisussarsiorsinnaalernissap isumaginissaa, taannalu 2015-ipp aallartinnerani atuutsilerneqassasoq naatsorsuutigaarput. Taamaalilluta suliffissat inuttaqanngitsut tamatigut takuneqarsinnaasassapput aammalu avataaneersunik sulisussanik tikisitsinissaq oqaluuserineqalersinnaanissaa sioqqullugu, nuna tamakkerlugu suliffeqanngitsunit tamanit qinnuteqarfigineqarsinnaasassallutik”.