Rubinisiorfissap aallartinneqarnissaa akuerisaavoq

Naalakkersuisut True North Gemsip Qeqertarsuatsiaat eqqaanni rubinisiorfissami aatsitassanik piiaanissamut atatillugu pilersaarutaa, tassa aatsitassanik tunisassiornermut aamma tunisassiorfiit pisariaqartut sanaartornissaannut pilersaarutit ingerlanissaat, tallimanngornermi majip 30.-anni akueraat

Akuersissuteqarnermut  allakkiami piiaanissamut matusinissamullu atugassarititaasut aalajangersarneqarput. Taanna tunisassiornermut sanaartukkanullu sinaakkutissiivoq. Suliassami ilaasut tamarmik ilaatinneqassapput, ilanngullugit sulisunut isumannaallisaaneq peqqinnissarlu, avatangiisinik allanngutsaaliuineq, suliassami attaveqarnermik pilersitsinerit allarpassuillu.  

Tamatuma saniatigut Naalakkersuisut TNG-imut ”Impact Benefit Agreement” (IBA) akuersissuteqarfigaat, tassani siunertaalluni inuiaqatigiit aamma inuiaqatigiit aningaasaqarneranni suliassamit sapinngisamik annertunerpaamik iluaquserneqarnissaannik qulakkeerinissaq. IBA aamma Kommuneqarfik Sermersuumit akuersissuteqarfigineqassaaq.

Inuussutissarsiornermut Aatsitassanullu Naalakkersuisoq Jens-Erik Kirkegaard ima oqarpoq ”Nuannaarutigeqaara suliniut aallartinneqalermat tamannalu Kalaallit Nunaannut suliffissanik nutaanik, inuussutissarsiutitigut periarfissanik aamma isertitassanik neriunaateqarluarpoq”, nangillunilu ”TNG illuatungeralugu isumaqatigiinniarnerni  aamma akuersissuteqarniarnermi kinguneqartussamik isumaliulerusussuseqartuuvoq aamma suleqatiginnikkusuttuulluni”.

Kommuneqarfik Sermersuumi Borgmesteri Asii Chemnitz Narup, kommunemi suliffissanut nutaanut iluarisimaarinnippoq: ”TNG najukkami sulisunik sulisoqarnissaminut pisussaaffeqarpoq. Tamanna kommunitsinnut iluaqutaassaaq minnerunngitsumik Qeqertarsuatsiaarmiunut”. 

”TNG-ip tunisassiornissamut sanaartornissamullu akuersissuteqarneq iluarisimaarpaa, suliassami ingerlaqqissinnaalersimmatigut. Sanaartornermut immikkoortumi aallartinnissarput qilanaaraarput, taamaalilluni sapinngisamik sukkanerpaamik tunisassiornerpiaq aallartissinnaaniassagatsigu”, Nick Houghton, TNG-mut pisortaaneq nuannaarluni oqarpoq.