Ulorianartunik eqqagassalerineq illoqarfinni tamani aqunneqarsinnaalissaaq

Kangaatsiaq aamma Nanortalik eqqagassanut ulorianartunut aamma tigooraavittaalerput. Taakkununnga batteriit atornikut, uuliakut, peerit innaallagissamik sipaartut kviksølvitallit, qalipaatit sinnikui allarpassuillu tunniunneqarsinnaalissapput.

”Eqqagassat ilaat immaqa taama ulorianartigisutut isikkoqarneq ajoraluartut eqqagassatut ulorianartutut taaneqartarput. Kisianni akuutissanik, soorlu kviksølvinik arrorsaatinilluunniit, avatangiisinut ulorianarsinnaanerat pissutigalugu avatangiisitsinnut siaruarterneqartussatut kissaatiginngisatsinnik akoqarsinnaapput. Naggataatigullu peqqissutsitsinnut eqquisinnaallutik. Taamaattumik kommunit tigooraavinnik immikkoortiterivinnilu sanaartornerini Naalakkersuisunit tapersersorneqarput”, Avatangiisinut Pinngortitamullu Naalakkersuisoq Kim Kielsen oqarpoq.

2011-mili kommunini tigooraavinnik pilersitsinermut kommunit tapiiffigineqartalerput. 2014-imi katillugit 984.000 koruunit Kangaatsiamut Nanortalimmullu immikkoortinneqarput.

Nunap assingani toornerit qorsuit ullumikkut tigooraaveqartunut takussutissaapput. Suli Qasigiannguit Qaanaarlu, aammalu nunatsinni nunaqarfiit 46-t tigooraaveqanngillat.

Nuna tamakkerlugu eqqagassanik ulorianartunik tigooraavinnik pilersitsisoqarnissaata tungaanut tigooraavinnut tapiisarnerup ukiuni tulliuttuni ingerlaannarnissaa naatsorsuutigineqarpoq.

Sulisut tigooraavinni sulisussat eqqagassanik passussinissamut ilinniartinneqarput.