Angallassineq pillugu isumaqatigiissutit nutaat

Ilaasunik angallassineq pillugu kiffartuunneqarnissamut isumaqatigiissutit nutaat


Nunaqarfinnut isorliunerusunullu ilaasunik angallassineq pillugu kiffartuunneqarnissamut isumaqatigiissutinut nutaanut neqerooruteqarnissamut najoqqutassat Namminersorlutik Oqartussat tamanut ammasumik saqqummiuteqqammerpaat. Isumaqatigiissutit nutaat 1. januar 2015 atuutilissasut naatsorsuutigineqarpoq.

Aningaasat atorlugit sapinngisamik assartuussinermik annertunerpaamik pissarsinissaq Naalakkersuisut pingaartittorujussuuaat, aammalu sumiiffinni arlalinni angallassinerup imaatigut angallassinermi aamma qulimiguulimmik timmisartuussinermi ataqatigiissitsiluni aaqqiissuteqarfigineqarsinnaanissaa periarfissaqarpoq. Suliaqartuusut taamaalillutik nutaamik eqqarsarnissaannik aammalu allatut aaqqiissutissanik sunniuteqarluartumik assartuusseriaatsimik pilersitsiviusussamik saqqummiusseqqullugit kaammattorneqarput.

”Nunarput tamakkerlugu angalanissamik periarfissaqarnissaq aammalu billetsit akiisa naleqquttumik annertussuseqartinneqarnissaat, kiffartuunneqarnissamik isumaqatigiissutini qulakkeerneqassaaq”, oqarpoq Peqqissutsimut Attaveqarnermullu Naalakkersuisoq, Steen Lynge, nangipporlu: ”Maluginiarpara sumiiffinni arlalinni maannakkkut aaqqiissutaasut naammagineqanngitsut, taamaattumillu angallannerup innuttaasunut inuussutissarsiortunullu iluaqutaasumik pitsanngorsarneqarnissaanut sapinngisara tamaat iliussaanga”.

Juunip naanerani neqerooruteqarnissamut piffissaliisoqarpoq. Tamatuma kingorna neqeroorutit ataasiakkaat akigititat, pilersuinerup qularnaassuseqarnera aamma pitsaassuseqarnera aallaavigalugit nalilersorneqassapput. Naatsorsuutigineqarpoq suliaqartuusut aggustip qiteqqunnerani isumaqatiginninniaqatigineqassasut, tamatumalu kingorna isumaqatigiissutit atsiorneqarsinnaalissapput.

Neqerooruteqarnissamut najoqqutassat Namminersorlutik Oqartussat neqeroortitsinernut nittartagaanni takuneqarsinnaapput: www.udbud.gl.

 

Annertunerusumik paasisaqarusunnermi attaveqarfissaq Siunnersortinut pisortaq Lene Riis +299  34 54 60