Pujortassaarit! sms-ikkut

Pujortartartut sms-ikkut pujortarunnaarnissamut ikiorniarlugit AKEQANNGITSUMIK nittartakkami peqqik.gl/1722 -imi periarfissaqalerpoq

Peqqissutsimut Attaveqarnermullu Naalakkersuisoqarfik sapaatip akunnera 22 pujortarfiunngitsumut atatillugu pujortarunnaarniartunut ikiuuttussamik, akeqanngitsumik sms-ikkut kiffartuussinermik saqqummiussinialerpoq.

Pujortarunnaarnissamik neqeroorut peqataasunut pujortarunnaarniarnermi tapersersuillunilu siunnersuisartussaq sapaatip akunnerini arfineq-pingasuni ingerlassaaq.

Pujortartarunnaarnissaq tapersersorteqartigani ikiuusersorneqaranilu ajornarsinnaasarpoq.

Nunatsinni innuttaasut 99%-ii angallattakkamik oqarasuaateqarput. Sms-ikkut pujortarunnaarnissamik neqeroorut, nunap ilaani sumiluunniit najugaqaraluaraanni, peqataasunut tamanut pisariippoq iserfigineqariaannaallunilu.

”- Pujortartarneq pitsaaliuinermi peqqinnerulernissamullu tunngasuni immikkut ukkapparput. Neqeroorutip uuma pissarsiariuminartup periarfissaareertunut allanut annertusaanertut isiginiaqquneqarpoq, neriuutiginarmammi pujortartartut amerlassusaannik killileeqataasinnaassasoq. Neriuppunga sms-ikkut pujortarunnaarnissamik neqeroorut, inuup nammineq peqqissusaanut tunngammat, atorluarneqarumaartoq,” Peqqissutsimut Attaveqarnermullu Naalakkersuisoq Steen Lynge oqaaseqarpoq.

Pujortartarneq nunatsinni inuit peqqissusaannut navianarnerpaat ilagaat. Innuttaasut affaat sinnerlugit 15-ileereersimasunit pujortartarput. Pujortarneq peqqissutsimut ajoqutaalluinnarpoq, nappaatinullu peruluutaasunut navianartorsiornermik annerulersitsisarluni, soorlu uummatip taqaasigut nappaatit kræftilu, inuunermi nalillit annikinnerulernerat siusippallaamillu toquneq.

Pujortassaarit! peqqik.gl/1722-imi nalunaarlutillu paasisaqarnerusinnaavutit.

Paasissutissat amerlanerusut pillugit attaveqarfigiuk:

Peqqissutsimut sulianut siunnersorti Nadja Frederiksen oqarasuaammut +299 34 66 76 imaluunniit e-mailimut nafr@nanoq.gl