Partiit apeqqutaatinnagit suleqatigiinnissaq pisariaqarpoq

Ilaqutariinnermut Inatsisinillu Atuutitsinermut Naalakkersuisoq kommuninilu isumaginnermut ataatsimiititaliat siulitaasui KANUKOKAlu peqatigalugit ataatsimeeqatigeeqqammerput meeqqanut inuusuttunullu sullissinerit, aammalu inuit sivisuumik suliffeqanngitsut siusinaartumillu sulisinnaajunnaarnersiuteqartunut suliniutit pillugit.

Ataatsimeeqatigiit isumaqatigiillutik isumaginnittoqarfinni suliassat oqimaatsut kivitseqatigiilluni suliarinissaannut partiit apeqqutaatinnagit suleqatigiittoqarnissaa oqariartuutigaat. Uggorusuutigineqarporlu Kommuneqarfik Sermersooq peqataatitsinngimmat.

Namminersorlutik Oqartussat oqariartuutigaat sullissinerup siunnersuinerup ilitsersuinerullu tungaatigut nukittorsaasoqarnissaa.

Ilaqutariinnermut Inatsitsinillu Atuutitsinermut Naalakkersuisoqarfiup sullissisut piginnaasaasa qaffassarneqarnissaannut suliniutit aallartissimasaat Iluarisimaarneqarput.

Kiisalu ataatsimeeqatigiit iluarisimaarpaat Naalakkersuisoqarfiup KANUKOKA suleqatigalugu meeqqat inuusuttullu pilersaarusiuunneqartarnissaannut suliat aallartinneqarsimasaat, taamaattorli ernummatigineqarpoq suliaq septemberip aallaqqaataa 2014 tikitsinnagu naammassineqarsinnaassanersut.

Inussiarnersumik inuulluaqqusillunga

Martha Lund Olsen