Naalakkersuisoqarfimmi pisortaaneq soraarniuteqarpoq

Peqqissutsimut Attaveqarnermullu Naalakersuisoqarfimmi pisortaaneq, Ann Birkekjær Kjeldsenip, september 2014-ip naalernerani atuutilersussaq, soraarniutini ulloq 22. maj tunniussimavaa.

Ann Birkekær Kjeldsen soraarniuteqarnerminut atatillugu oqarpoq, piffissami sivisujaami eqqarsaatigereerlugu, nutaanik misilitaqarusunnini kissaatigigamiuk soraarniuteqarnissani aalajangiussimallugu.

Ann Birkekær Kjeldsen ukiuni 25-ni pisortani atorfeqarsimavoq, siullermik Namminersornerullutik Oqartussani, kingusinnerusukkullu Namminersorlutik Oqartussani, kingullertigullu naalakkersuisoqarfimmi pisortatut.

”Naalakkersuisoqarfinni pisortaqatigiit sinnerlugit Ann Birkekjær Kjeldsen suleqatigiilluarsimanitsinnut qujaffigerusuppara”, Naalakkersuisut Siulittaasuata Naalakkersuisoqarfiani pisortaaneq Svend Hardenberg oqarpoq.

Naalakkersuisoqarfimmi pisortamik nutaamik toqqaasoqarnissaata tungaanut Julie Præst Wilche naalakkersuisoqarfimmi pisortaanerugallassaaq.