Siulersuisuni ilaasortat taarsersornerat siunertaqarpoq

Piffissami kingullermi ingerlatseqatigiiffinni Namminersorlutik Oqartussanit pigineqartuni Naalakkersuisut siulersuisuni ilaasortanik taarsersuinerat Nunatsinni tusagassiutini arlalinni sammineqarpoq.

Naalakkersuisut siulersuisuni ilaasortaasimasut inuusunnerusunik taarsersuissallutik aalajangersimanerat isornartorsiuinerup ilagaa.

Kisianni Naalakkersuisut Siulittaasuat Aleqa Hammond isumaqarpoq, taamatut isornartorsiuineq tunngavissaqaranilu peqqutissaqanngitsoq.

”Siulersuisuni ilaasortat taarsersussallugit aalajangernerput, sulianik nalilersuinermik tunngaveqarpoq. Taamaattumik siulersuisuni ilaasortat piginnaasaqarnerat, ukiui pinnagit tunngavigalugit toqqagaapput. Siulersuisuni siulittaasuusimasut sulisimanerat qujamasuutigeqaarput. Taamanna oqaatigereerlugu aamma isumarput tassaavoq, maannakkut nukiit nutaat qanoq naleqarnerminnik takutitsinissaannut piffisanngormat”, Aleqa Hammond oqarpoq.

Innuttaasut sinniisuuffigisussaavaat

”Ingerlatseqatigiiffinni Namminersorlutik Oqartussanit pigineqartuni siulersuisunik katiterigaangatta, kikkut suliamik kivitsissallutik piukkunnaateqarnerpaanersut pingaartittarparput. Taamaattumik siulersuisuni ilaasortat ataasiakkaat piginnaasaat pingaartinnerpaasarpavut. Kisianni aamma eqqarsaatitsinniittarpoq, siulersuisuni ilaasortat tassaassasut sapinngisaq tamakkerlugu innuttaasut sinniisorisassaat. Taamaattumik siulersuisuni ilaasortat ima katiterniartarpavut, inuussutissarsiortut Kujataaneersut, Tunumeersut Avannaaneersullu sapinngisaq tamakkerlugu sinniisoqartinniartarlutigit. Taassuma saniatigut siulersuisuni ilaasortat arnat angutillu amerlaqatigiinnissaat 1. januar 2014 atuutilerpoq, tassa ilaasortat affaat arnaassasut affaallu angutaassasut. Tamannalu maannamut atuutsinneqarsimanngimmat, ukiunut siuliinut naleqqiullugu ukioq manna taarsersuineq annertunerulaarsimavoq,” Aleqa Hammond oqarpoq.

Siulersuisuni ilaasortat piffissaq ilaasortaaffissartik suli qaangiutinngitsoq, ilaannullu ukiuni marlunni atuukkajuttartoq, taarserneqarsimanerat Nunatsinni tusagassiutini aamma isornartorsiorneqarpoq.

Kisianni siulersuisuni ilaasortat taarserneqartigatik ukiuni marlunni issiasarnissaat Naalakkersuisunit aalajangerneqarsimanngisaannarpoq.

”Taarsersuinerit allannguuteqartitsisarnerat ilumoorpoq. Kisianni allannguineq ajortuinnaaneq ajorpoq. Paarlattuanik Naalakkersuisuni upperaarput, taarsersuinerit ingerlalluarnissap upperineranik nukinnillu nutaanik, aamma siulersuisuni, nassataqarumaartut,” Aleqa Hammond oqarpoq.

Paasissutissanik sukumiinerusunik pissarsiniarfigineqarsinnaasoq:
Rasmus Pedersen, Immikkoortortaqarfimmi Pisortaq, Ingerlatseqatigiiffinnut Allattoqarfik, oq. 34 51 27