Ålandip Lantrådia Camilla Gunell Kalaallit Nunaannut tikeraarpoq


Naalakkersuisut Siulittaasuata Aleqa Hammondip suleqatini Ålandimeersoq Kalaallit Nunaannut ulluni 23. – 26. maj 2014 tikeraarnissamut qaaqqusimavaa.

Nunani avannarlerni nunap immikkoortuini politikkikkut suleqatigiinnermi nunat namminersortut pingasut: Savalimmiut, Åland aamma Kalaallit Nunaat, akornanni suleqatigiinneq ukiut pingasut kingulliit ingerlaneranni nukittorsarneqarpoq. Tamanna immikkut 2010-imi malunnartinneqarpoq, tassani nunat pingasut taakkua Nunani Avannarlerni Siunnersuisooqatigiinni aallartitaat Nunani Avannarlerni Suleqatigiiffimmut, Nunani Avannarlerni Siunnersuisooqatigiinni aamma Nunani Avannarlerni Ministerit Siunnersuisooqatigiivini peqataasut akornanni oqaloqatigiittarnernik nukittorsaanermik kinguneqartussamut, atsioqataapput.

Nunani avannarlerni suleqatigiinnermi peqataanerup nunat politikkikkut maannakut apeqqutit pillugit saniliminnik oqaloqateqartarnerannut pingaaruteqarnera, nunanut tamanut atuuppoq. Kisianni peqatigisaanik isumalluutissat atorneqarsinnaasut killeqarmata suleqatigiinneq isumaqarpoq tapersersoqatigiittoqarsinnaasoq, taamaalilluni nunat namminersortut pisuni aalajangersimasuni najuutinngikkaluarlutik taaseqataasinnaallutik.

Åland nunatut namminersortutut oqaluttuarisaanermi sivisuumik ingerlasimavoq, taamaattuillu suliaqarnermi iluatinnaateqartunik misilittagaqarluni. Nunani avannarlerni suleqatigiinnermi Åland killeqarfinni aporfiusartunik annikillisaanermik suliaqarnermi ukiuni arlalinni peqataasimavoq, aammalu tassani Kalaallit Nunaani suliaqarnermi tassani ukioq manna 1. januar peqataalersoq Ålandimi misilittakkanik iluaquserneqarsinnaalluarpoq.

Suleqatigiinnerup aalajangersimasumik inerneraa, nunat pingasut taakkua naalakkersuisuni siulittaasuisa maannakkut aamma nunani avannarlerni naalagaaffimmi ministerit ileqquusumik aasaanerani ataatsimeeqatigiinnissaannut ukioq manna Island-imi ulloq 27. maj pisussami qaaqquneqarnerat.

Kalaallit Nunaanni ataatsimiinnermi naalakkersuisuni siulitaasut marluk taakkua Island-imi naalagaaffimmi ministerit ataatsimiinnissaat pisussaq aammalu nunani avannarlerni apeqqutit maannakkut pisut oqallisigaat.

Februaarimi nunani avannarlerni suleqatigiinnermut ministerit nunani avannarlerni suleqatigiinnermut anguniakkatik saqqummiuppaat. Anguniakkat taakkua nunani avannarlerni suleqatigiinneq suleqatigiinnertut nutaaliorfiusutut, Nunani avannarlerni ersarissuusussatut aammalu Europa-mut nunarsuullu sinneranut Nunat avannarliit malunnartinneqarnerisigut  malunnartissavaat.

Lantråd Camilla Gunellimik ataatsimeeqateqareernermini Aleqa Hammond oqarpoq:

”Nunat avannarliit nunarsuarmioqatitsinnut annertusiartuinnartumik malunnartitsisalermata, uagut nunanit namminersortuneersugut suliaqarnermi peqataanissarput aammalu nunani avannarlerni ataatsimooqatigiinnut ilaanitta malunnartittarnissaa pingaaruteqarpoq. Nunani avannarlerni nunat namminersortut innuttaasunit amerlasoorsuunngitsunit aallartitaapput, kisianni nammineerluta aalajangertussaavarput ersarissuuniarnerluta, assersuutigalugu Nunat avannarliit avammut ataatsimoorlutik malunnartitsigaagata.

Islandimi naalagaaffimmi ministerit ataatsimiinneranni pisussami nunani avannarlerni suleqatigiinnermi, Nunani Avannarlerni Ministerit siunnersuisooqatigiiffianni pisussaanngitsumi, naleqquttumi peqataanissarput pillugu kissaateqarnerput ataatsimoorluta saqqummiupparput aammalu naatsorsuutigaara tamanna naalagaaffimmi ministerinit tigulluarneqarumaartoq.

Åland  ukiuni arlalinni nunani avannarlerni suleqatigiiffimmi killeqarfinni aporfiusartut pillugit suleqataasimavoq, tassani uagut aatsaat aallartilluta, peqatigisaanillu Åland imarsiornerup iluani aammalu nunatut takornariartitsisartutut annertoorujussuarmik misilittagaqarpoq. Taamaattumik suliassaqarfinni taakkunani suleqatinnut Åland-imeersumut misilittakkanik paarlaasseqatigiinnissaq iluaqutaasimavoq.”

 

 

Paasissutissanik allanik pisoqarusuttoqarpat attavigineqarsinnaavoq:

Seniorrådgiver Jørgen S. Søndergaard, Nunanut Allanut Pisortaqarfik, Mobil: +45 40 34 31 23