Aleqa Hammondip franskit arsallammattaat ilassivai


Franskit isikkamik arsallammattai, arsaattartutut soraarninngorsimasut, taakkununnga ilaalluni nunarsuarmi tusaamasaasoq Robert Piris, tuluit isikkamik arsartartut klubbiannut Arsenalimut unammeqataasarsimasoq Nuummut ataasinngornermi maajip 19-ianni tikipput. Tikeraat Nuummiinnerminni marloriarlutik kalaallit arsartartuinut immikkut unammisussanngorlugit toqqagaasunut assut alutorsaatigineqartumik unammipput, Nuumminnerminnilu Nuuk Centerimi innuttaasunut naapitsipput atsioqattaarlutillu assilisillutik.

Tikeraat nunaminnut uterlutik aallanngitsiartut Naalakkersuisut Siulittaasuata Aleqa Hammondip Aalisarnermut, Piniarnermut Nunalerinermullu Naalakkersuisumit Finn Karlsenimit ingiallorneqarluni nunatsinnut tikeraarsimanerat pillugu qutsaviginiarlugit naapippai. Qutsaviginninnermi tikeraat tujuuluaqqanik nappaassuarmut kræftimut akiuiniarluni suliniarnermut atatillugu suliaasunik, kræftimut akiuiniarluni ilisarnaateeqqat Kalaallit Nunaattut isikkulerlugit ilisarnaatitalinnik tunissuteqarfigai sungiusaasuannullu atuagaq assiliisartup Carsten Egevangip atuakkiaa

”Grønland – Dyrenes og menneskenes land” kusanartunik assiliartalersugaq aamma tunniullugu.

Franskit arsaartartorisimasai tusaamasarsuit angalaqatigiittartullu Variétés Club de France, ullumi sisamanngornermi 22. maj 2014 nunaminnut uterlutik aallartussat, Kalaallit Nunaannukarnissaq sivisuumik kissaatigisimavaat nunatsinnullu tikeraarnertik tamaat namminneq akilerlugu tikipput.

Assilisat.