A/S Inissiaatileqatigiiffik INI ileqquusumik ataatsimeersuarpoq

Marlunngorneq ulloq 20. maj 2014 nal. 14.00 A/S Inissiaatileqatigiiffik INI Sisimiuni INI-p qullersaqarfiani ileqquusumik ataatsimeersuarpoq.

Ingerlatseqatigiiffiup ukiumoortumik nalunaarutaata akuersissutigineqarnera ataatsimeersuarnermi oqaluuserisassanut ilaavoq.

Ukiumoortumik nalunaarummi takuneqarsinnaavoq 2013-imi akileraarutit ilanngaatigeqqaarnagit sinneqartoorutit 1,4 mio. kruuniusut akileraarutillu ilanngaatigereerlugit sinneqartoorutit 924.000 kruuniullutik, angusallu naammaginarput.

Siornamut naleqqiullugu ingerlatseqatigiiffiup ilanngaatigisassat ilanngaatigereerlugit kaaviiaartitai 3,6 mio. kruuninik qaffariarput, tamannalu akiliutinit isertitat qaffariarsimanerannit kiisalu teknikkikkut siunnersorneqarnermit kiffartuunneqarnermillu kaaviiaartitat qaffasinnerusimanerannit pissuteqarpoq.

INI ukiup ingerlanerani malunnaatilimmik allannguuteqarsimavoq. INI-p ilaatigut 2013-imi ingerlatseqatigiiffiup sanaartugassanut teknikkikkut immikkoortortaqarfik, siusinnerusukkut INI-p avataaneersunit isumagineqartarsimagaluartoq, imminut utertissimavaa, INI-llu sanaartugassanut sullissivia naalakkersuisoqarfimmut utertinneqarsimalluni.

INI-p piffissap ingerlanerani ineqarnermut allaffissornikkut aqutsivittut ingerlatseqatigiiffinngortinnissaa pilersaarutaavoq.

”Naalakkersuisut neriupput naatsorsuutigalugulu, INI-p anguniagassamisut siunniussimasani angussagai,” Naalakkersuisut Siulittaasuat Aleqa Hammond oqarpoq.

Siulersuisuni ilaasortat taarserneqartut

Ataatsimeersuarnermi siulersuisuni siulittaasoq Jette Larsen qinerneqaqqippoq.

Taassuma saniatigut A/S Inissiaatileqatigiiffiup INI-p siulersuisuni ilaasortat nutaat Carsten Pietras, Karin B. Orgland aamma Jakob Abelsen tikilluaqquai.

Ataatsimeersuarnermut atatillugu siulersuisuni ilaasortaasimasut Kristian May, Lissi Olsen aamma Bjarne Krog-Jensen inuulluaqquneqarput.

”Naalakkersuisut sinnerlugit A/S Inissiaatileqatigiiffik INI 2013-imi suleqatigiilluarsimanermut qujaffigerusuppara. Naak pitsanngoriaatissaqartoqarsinnaagaluartoq, ingerlatseqatigiiffik naammaginartunik angusaqarsimammat nuannaarutigaarput. INI suli ineriartorpoq, siulersuisuni ilaasortaasimasut ineriartornermut tamatumunnga pitsaasunik tunniussaqarsimapput. Taakkununnga Naalakkersuisut nersorinnissutaat sulisimanerannullu qujassuteqaataat apuukkusuppakka,” Aleqa Hammond oqarpoq.

Paasissutissanik sukumiinerusunik pissarsiniarfigineqarsinnaasoq:

Rasmus Pedersen, Immikkoortortami Pisortaq, Ingerlatseqatigiiffinnut Allattoqarfik, oq. 34 51 27

 

Assiliisoq:Ole Petersen, Attaveqarnermi sulisoq, A/S Inissiaatileqatigiiffik INI