Nipisat pisassiissutaasalissapput

Stemningsbillede

Nipisat MSC-mik 2015-imi meqqilerneqartarnissaat anguniarlugu Naaalakkersuisut nipisanniarneq pillugu pilersaarut kiisalu maannakkut nalunaarutip atuutsinneqartup arlalinnik allannguuteqassasoq akuersissutigaat, aalisartut kissaataat naapertorlugit.

Naalakkersuisut akuerivaat nalunaarummi maannakkut atuuttuusumi uku allannguutaassasut: Inuussutissarsiutigalugu nipisanniarniaraanni akuersissuteqartariaqarnissaq, taanna sivisunerpaamik ukiunut marlunnut atuuttussanngorlugu tunniunneqartassalluni.

Aqutsiveqarfiit ataasiakkaat aalajangersimasunik pisassinneqartalissasut, taakkunanilu ullut aalisarfiusartussat amerlanerpaaffissaannik aalajangersaasoqassasoq.

Inuussutissarsiutigalugu aappaagumit nipisanniarniaraanni akuersissuteqartariaqartarnissaq, taanna sivisunerpaamik ukiunut marlunnut atuuttussanngorlugu tunniunneqartassalluni.

Akuersissummi uku aalajangersarneqarsimasuusinnaallutik; qassutit qassit akuersissummi ataatsimi atorneqarsinnaanerat, sumiiffimmi sorlermi aalisartoqarsinnaanersoq aamma aalisarfinni ataasiakkaani piffissap qanoq ilinerani aalisartoqarsinnaanersoq.

Pisisartut ilisimavaat

Aalisarnermik aningaasarsiuteqartut kissaatigisimavaat MSC-mik meqqilersuisoqassasoq, pisiassat meqqeqarpata aningaasarsilluaataasinnaasutut naliliisoqarluni.

- Europami pisisartunit niuerfinnillu allanit pisuussutinik uumassusilinnik piujuartitsinissamik tunngaveqarluni atuinissap pisariaqarnera ilisimaneqaleraluttuinnarpoq, Aalisarnermut, Piniarnermut Nunalerinermullu Naalakkersuisoq, Finn Karlsen oqarpoq.

- Tamanna tunngavigalugu nunat tamalaat akornanni aalisakkanik tuniniaasartunit aalisarnerup piujuartitsinissamik tunngaveqarluni ingerlanneqarneranut uppernarsaasersuisoqartarnissaanut avatangiisinillu mianerinnittumik aalisartoqarneranut piumasaqaatit sakkortusiartuinnarput, Finn Karlsen erseqqissaavoq.