TELE Greenland A/S ileqquusumik ataatsimeersuarpoq

Marlunngorneq ulloq 13. maj 2014, nal. 15.00 Tele Greenland A/S Nuummi ileqquusumik ataatsimeersuarpoq.

Ingerlatseqatigiiffiup ukiumoortumik nalunaarutaa ataatsimeersuarnermi ullormut oqaluuserisassanut ilaatigut ilaavoq.

Ukiumoortumik nalunaarummi naatsorsuutigineqartutut akileraarutit ilanngaatigereernagit 94,3 mio. kruuninik akileraarutillu ilanngaatigereerlugit 64,0 mio. kruuninik sinneqartooruteqarneq takuneqarsinnaavoq, angusallu naammaginarput.

TELE Greenland 2013-imi ukiup ingerlanerani iliuuserisat assigiinngitsut aallartinneqarnerisa kingorna internetikkut atuinermi ineriartorneq annertooq pivoq. Taassuma saniatigut suliffeqarfissuup poortukkanik nassiussisarnermi nassiuttakkat ukiut arlallit ingerlanerini ikiliartorsimasut, ilorraap tungaanut saatippaa. Allakkalli nassiunneqartartut ikileriarput, innuttaasullu sms-imik oqarasuaatinillu atuilluarunnaarmata, siorna sinneqartoorutigineqartut qaangerneqarsinnaasimanngillat.

Aammattaaq Tele Greenland 2013-imi kabelip immap naqqatigoortup marloriarluni ajutoorneranut ilungersunartumut 13,5 mio. kruuninik aningaasartuuteqarpoq, tamannalu aamma 2013-imi kaaviiaartitat ikileriarsimanerannut pissutaasunut ilaavoq.

Siulersuisuni ilaasortat taarsernerat

Ataatsimeersuarnermi Agner N. Mark aamma Søren Voigt siulersuisuni ilaasortatut qinerneqaqqipput.

Taassuma saniatigut Tele Greenlandip Paneeraq Olsen aamma Edda Lyberth siulersuisuni ilaasortatut nutaatut tikilluaqquai.

Ataatsimeersuarnermut atatillugu siulersuisuni ilaasortat, Aaja Chemnitz Larsen aamma Line Frederiksen, kiisalu siulersuisuini ilaasortaq sulisunit toqqagaq, Benedikte Jensen siulersuisuni ilaasortaajunnaartut inuulluaqquneqarput.

”Telepost aallartinnerminiit ineriartorsimaqaaq, siulersuisunilu ilaasortat arlallit, maanna ilaasortaajunnaartut, tamatumunnga annertuumik sunniuteqarput. Taakkununnga Naalakkersuisut nersorinninnerat qujanerallu apuukkusuppara. Ingerlatseqatigiiffiup siunissaq pissanganartoq iserfigigaluttuarpaa, tamatumani siulersuisuni ilaasortat nutaat akisussaaffigissallugu internetimik atuineruleriartornermik pisariaqartitsineruleriartornermillu pissuteqartumik flatratep isumannaatsumik atortuulersinneqarnissaa. Naalakkersuisut qularinngilaat, Tele Greenland A/S-ip takorluukkani nutaat piginnaasanilu annertuut tunngavigalugit ingerlatseqatigiiffimmik ineriartortitseqqissinnaasoq,” Naalakkersuisut Siulittaasuat Aleqa Hammond oqarpoq.

Ataatsimeersuarnermi aalajangerneqarpoq, TELE Greenlandip piginnittunut, Namminersorlutik Oqartussanut, sinneqartoorutinit 47 mio. kruunit agguagarsiatut tunniutissagai.

Paasissutissanik sukumiinerusunik pissarsiniarfigineqarsinnaasoq:

Rasmus Pedersen, Immikkoortortami Pisortaq, Ingerlatseqatigiiffinnut Allattoqarfik, oq. 34 51 27