Peqqinnissaqarfimmut Attaveqarnermullu nakussassaaneq

Peqqinnissaqarfimmut Attaveqarnermullu nakussassaataasumik aallartisaanerit

Iluarsagassanut sanaartugassanullu suliassanik siuartitsineq peqqinnissaqarfimmut 12,7 mio. koruuninik, umiarsualivinnik aserfallatsaaliuinermut 8,9 mio. koruuninik aamma 17,3 mio. koruunit mittarfinnik iluarsaassinernut suliniuteqarneq pitsaasuuvoq, kalaallini inuiaqatigiinni sulinermik neriulluarnermillu pilersitseqqissinnaavoq.

Peqqinnissaqarfiup pissarsiai 12,7 mio. koruuniupput. Taakkunannga 7,7 mio. koruunit Maniitsumi, Nuummi, Aasianni, Nanortalimmi, Ittoqqortoormiini, Qasigiannguanni Qaqortumilu qitiusumik napparsimmavinni peqqissaaviillu nukissatigut ineriartortitsinerit pitsaanerulersinnerinut atorneqassapput. Sinneruttut 5 mio. koruunit nalinginnaasumik nuna tamakkerlugu peqqinnissaqarfiup illuutaasa aserfallatsaalinerinut atorneqassapput.

"Innuttaasunut napparsimasunullu ataasiakkaanut sullissinerup pitsaanerulersinnissaa  ukkallugu aningaasat atorneqarsinnaanngornissaat Peqqissutsimut Attaveqarnermullu Naalakkersuisutut uannut pingaaruteqarsimavoq", Peqqissutsimut Naalakkersuisoq oqarpoq.

Nukissatigut ineriartortitsinerit pitsaanerulersinnerisa, kallerup inneranut kiassarnermullu ingerlatsinermut Peqqinnissaqarfiup aningaasartuutai annikinnerulersissavaat.   

Sipaarniuteqarneq taanna sullissinermut, suliassat aalajangersimasut misissornerinut aamma katsorsaanernut neqeroorutinut aalajangersimalluinnartumik atorneqassaaq.

"Pilersitsiniarnikkut tassuuna, peqqinnissaqarfimmi pitsaanerulersitsinissaq pillugu anguniakkakka 2014-mi pingaarutilimmik pitsanngoriartivissussavai. Nutaarsiassaq pitsaalluinnartuuvoq ingammik piffissami Kalaallit Nunaanni inuussutissarsiutitigut ingerlatsiniarnerup ajornarsigaluttuinnarfiani", Naalakkersuisoq Steen Lynge (Atassut) oqarpoq nangillunilu:

”Aamma attaveqarnermut tunngasuni iluarsagassanut sanaartugassanullu suliassat

26,2 mio. koruuninik siuartikkutsigit, piffissami ungasippallaanngitsumi suliassat amerlanerusut suliaqarnerulernissarlu Kalaallit Nunaanni suliffeqarfiit ilaasa takorloorsinnaalissavaat – tamannalu nuna tamakkerlugu sulinerup pitsaanerulerneranik paasineqarsinnaassaaq.”

Attaveqarnermut tunngatillugu Kullorsuarmi, Kitsissuasuarsunni, Ikamiuni umiarsualiviit aamma Kulusummi, Narsarsuarmi Kangerlussuarmilu mittarfiit aserfatsaalineqarnerinut aningaasat atorneqassapput. Peqqissutsip attaveqarnerullu 2014-mi iluarsagassanut sanaartugassanullu immikkut 40 mio. koruunit missaat matumuuna atussavai. Taakkunanga 16 mio. koruunit missaat suliffeqarfinni sulisut nutaat sulinerisa akissarsiaannut aamma 24 mio. koruunit missaat atortussanik pisinermut toqqaannartumik ingerlatinneqassapput. Iluarsagassanut sanaartugassanullu suliassat suliffeqarfinnit namminersortunit ingerlanneqassapput aamma suliffissaqartitsinerulernerat 2014-mi inunnik 130-nik qaffariaateqassasoq naatsorsuutigineqapoq.  

”Sanaartugassanut iluarsagassanullu suliassanik siuartitsineq kalaallit aningaasaqarneranut tamanut pisariaqartinneqartumik nakussassaataasumik aallartissaaneruvoq peqatigitillugulu imaappoq, pisortat aningasaliinerinik pimoorussamik piviusunngortitsinerulluni,” Steen Lynge naggasiivoq. 

 

Inussiarnersumik inuulluaqqusillunga

 

Lea Holm [Navn 2]

Toqq/direkte 346605[Tlfnr.]

leah@nanoq.gl

 

Leif Grønvold Jensen

Toqq / direkte 346616

legj@nanoq.gl

 

Henrik Overvad

Toqq/direkte 344941

HEOV@peqqik.gl