Aalisakkat misileraassutigineqassasut

Aalisarnermut, Piniarnermut Nunalerinermullu Naalakkersuisoq, Finn Karlsen, Tunumi misileraalluni aalisarnissamut akuersivoq.

Aalisakkat uku pineqartut aalisarneqarsinnaallutik; najorpilikkat 500 tonsit, aalisakkat qallunaatut langemik pineqartartut 500 tonsit aamma blålangenik pineqartartut 500 tonsit, katillugit 1.500 tonsinik oqimaassusillit
Naalakkersuisoqarfik Norgimit saaffigineqarsimavoq ilisimatinneqarlunilu aalisakkanik pineqartunik Tunumi, aalisarfimmi nutaami pisaqartoqarsimasoq.

Norge najorpilikkanik 200 tonsinik, langenik 200 tonsinik blålanginillu aamma 200 tonsinik misileraataasumik pisassinneqarpoq. Sinneri nunatsinni aalisarnermik inuussutissarsiutillit qinnuteqarlutik aalisarsinnaassagaat.

Aalisakkat akilersinnaasumik aalisarneqarsinnaanissaat qulakkeerumallugu, aalisakkallu qanoq amerlatigineri paasiumallugit, Pinngortitaleriffik aalisariutinut piumaffiginnippoq sumi aalisarsimanertik nalunaarsortassagaat, aalisakkat qanoq angitigineri uuttortassagaat sissiilu aamma nalunaarsortassagaat.