Piniarnermut allagartallit ikilerujussuartut

Inuussutissarsiutigalugu piniarnermut allagartallit ukiuni kingullerni 20-ni amerlassusaat ikilerujussuarput, affaannanngorlutik. Natsiit aataallu ukiuni kingullerni pisarineqartartut aamma ikilerujussuarput.

Aalisarnermut, piniarnermut nunalerinermullu kisitsisaataasa takutippaat inuit inuussutissarsiutigalugu piniarnermut allagartamik akiliillutik 1993-mi pisimasut 4.068-usut, 1996-imi 2.715-iniullutik, ukioq kingulleq 1.996-iniullutik. Inuussutissarsiutigalugu piniarnermut allagartallit 2.072-nik ukiut 20-t ingerlanerini ikileriarujussuarlutik.

Inuussutissarsiutigalugu piniarnermut allagartallit matumani pineqarput, taakku tassaapput puisit amiinik Great Greenlandimut tunisisinnaatitaasut.

Natsiit aataallu ukiuni kingullerni arfineq marlunni pisarineqartut 32 procentinik ikileriarujussuarput. 2006-imi pisarineqartut 153.868-usut 2012-mi 104.439-t pisarineqartut. 2013-imut kisitsisaagallartut takutippaat 89.005-t pisarineqartut.

KNAPK-ip puisinniartartut puisinniartartut amerlassusiisa misissuiffigineqarnerata takutippaa puisinniartartut EU-p puisit amiinik eqqusseqqusaajunnaarnerata kingorna 34 procentinik ikileriartut. Misissuinerullu aamma takutippaa puisinniartartut puisit amiinik tunisaqartarnermikkut aningaasarsiarisartagaat aamma ikilerujussuartut, 33 procentinik ikileriarlutik. KNAPK 2012/13-imi misissuivoq.

27 million koruunit puisit amiinut tapiissutaapput

Aalisarnermut, Piniarnermut Nunalerinermullu Naalakkersuisoq, Finn Karlsen, aalisarnermut, piniarnermut nunalerinermullu ataatsimiititaliami ilaasortanut, aningaasaqarnermut akileraartarnermullu ataatsimiititaliami ilaasortanut, nunanut allanut sillimaniarnermullu ataatsimiitsitaliami ilaasortanut kiisalu KNAPK-mut sapaatip akunnerani kingullermi ilisimatitsinermini erseqqissavoq Namminersorlutik Oqartussat ukiut 25-t sinnerlugit puisit amiinik tunisinermut aningaasanut inatsisikkut tapiissutitut aningaasaliisarsimasut.

- Ukioq manna aningasaliissutit 26,7 million koruuniupput, Finn Karlsen oqarpoq.

EU-p amernik eqqusseqqusiunnaarnerata kingunerisai Great Greenlandip naatsorsuutaani atuarneqarsinnaapput, EU-p 2005-imi eqqusseqqusiunnaarnera ukiumik ataatsimik sioqqullugu kaaviiartitai 63 million koruuniupput, 2013-imi taamaallaat 15 million koruuniullutik.

Finn Karlsenip ilisimatitsinermini oqaatigaa suleqatigiissitamik pilersitsisoqassasoq, suleqatigiissitap puisit amiisa tuniniarneqartarnerinut suleriaasissamik siunnersuusiortussamik.

Finn Karlsenip nassuiaataa uani atuarneqarsinnaavoq:

http://naalakkersuisut.gl/kl-GL/Naalakkersuisut/Pisut/2014/05/Finn-Karlsen-orienterer-udvalgsmedlemmer