Nuup Kangerluani umimmaat kisinneqassapput

Aalisarnermut, Piniarnermut Nunalerinermullu Naalakkersuisoqarfik Kommuneqarfik Sermersooq suleqatigalugu umimmaat Nuup Kangerluata qinnguaniittut, Nunatarsuup eqqaani Saqqarsuarmiittut, kisinneqarnissaannik pilersaaruteqarput.

Kommuneqarfik Sermersuup Kommunalbestyrelsianut siunnersuut kisitsinissamut pissutaavoq. Nuup eqqaani umimmaat amerliartupiloortorujussuunerat pillugu oqaatigineqartoq ilumuunnginnersoq imaluunniit ilumoornersoq paasissallugu kisitsinermi siunertaavoq taakkumi qanoq amerlatigineri maannamut ilisimaneqanngimmat.

Siunnersuummi novembarimi 2013-imeersumi allaqqavoq umimmaat nunatani takuneqartalersimasut maannakkullu Kapisillit eqqaanni kangerluk ikaarlugu ingerlaareersimasut.

- Umimmaat Ameralimmi aamma takuneqartalerput siunnersuuteqartorlu isumaqarpoq umimmaallu piaartumik iliuuseqarfigineqanngippata ajornartorsiutit allat takkussinnaammata.

Pinngortitaleriffik Kommuneqarfik Sermersuup tusarniaassutaanut akissuteqaammini allappoq Nuup eqqaani umimmaat qanoq amerlatigineri ilisimaneqanngitsoq.

- Nuup eqqaani umimmannik 2002-mi aasakkut takunnittoqaqqaarnerata kingorna amerlisimanissaat ilimanarpoq. Sulilu amerliartornerat aamma ilimanarluni kisianni amerlerujussuarnerat uppernarsarneqarsinnaanngilaq, Pinngortitaleriffik erseqqissaavoq.

Pinngortitaleriffiup ilanngullugu ilisimatitsissutigivaa Kangaamiut Sermianit Nuup Kangerluanut 2001-imit 2013-ip tungaanut sisamariarluni tuttunik kisitsisoqarsimammat kisitsinernilu taakkunani umimmammik ataatsimilluunniit takunnittoqarsimanani nangillunilu allappoq umimmaat tuttut nerisartagaannut akornutaanerat ilisimatuussutsikkut uppernarsaatigineqanngitsoq.

Aalisarnermut, Piniarnermut Nunalerinermullu Naalakkersuisoqarfik Kommuneqarfik Sermersuup tusarniaaneranut akissuteqarnermini umimmaat Nunatarsuup eqqaani Saqqarsuarmiittut kisinneqarnissaat siunnersuutigivaa.

- Siunnersuutigaarput tamaani umimmannik takunnittoqarsimanera peqqutaalluni kisitsisoqassasoq. Umimmaat amerlassusaat paasereerutsigu tamaani, nunaminertat ilaanni inuussutissarsiutigalugu piniartunut tammajuitsussarsiniarlunilu piniartunut umimmattassiisoqarsinnaanera nalilersorneqarsinnaassaaq, Aalisarnermut, Piniarnermut Nunalerinermullu Naalakkersuisoqarfik allappoq.

Paasissutissanik sukumiinerusunik pissarsiniarnermi allaffimmi pisortaq Amalie Jessen, amalie@nanoq.gl, saaffigineqarsinnaavoq