Inuit Silamut aningaasaliissutissat

Aalisarnermut, Piniarnermut Nunalerinermullu Naalakkersuisoqarfik Naalakkersuisunut ilaasortap, Finn Karlsenip, isummernissaanut tunngavissiivoq, inassutigalugu Naalakkersuisoqarfik suliniutip Inuit Silap suliniutigineqarnerata 2015-imi nanginneranut 865.000 koruunit aningaasaliissutigineqassasut, 2015-imi aningaasanut inatsisissami siunnersuutitut ilanngunneqassallutik.

Suliniummut 2013-imi aamma 2014-imi ukiut tamaasa aningaasaliisoqartarpoq. Ukiumi missingersuusiorfiusumi 2015-imi ukiut pingajuannut naggataannullu “Puisit amiinut piniarnermullu tunngatillugu paasititsiniaaneq”-mut illikartitsisoqarsimanngilaq.

Suliniut taakkununngalu atuineq pillugu paasititsiniaanertut “Inuit Sila”-mik taallugu ingerlanneqarpoq, puisit amii puisinniarnerlu pillugit nunani tamalaani paasititsiniaanermut aningaasat atorneqarlutik.

EU-p 2010-mi eqqussuinissamik inerteqquteqarnera atuutilermalli assigiinngitsutigut nunatta puisinik imaatigullu isumalluutinik atuinerata ilisimaneqarnera siammarterniarlugu sulisoqarpoq.

EU-mut allakkatigut uppernarsaasiisaraluarluta kiisalu arlalitsigut ornillugillu tusarniaaffigisaraluarlugit paasinarsivoq politikikkut ingerlatsisuni innuttaasunilu ilisimasaqanngitsoqartoq.

Inuit Silap ajornartorsiut taanna ikiorsiiviginiartussaavaa, taannalu Namminersorlutik Oqartussanit nammineq sulianut tunngasunik ilinniarluarsimasunillu suleqatigineqartut aqqutigalugit suliarineqarsinnaanngilaq.