Royal Arctic Line A/S ileqquusumik ataatsimeersuarpoq

Marlunngorneq ulloq 6. maj 2014 nal. 14.00 Hotel Hans Egedemi Nummiittumi Royal Arctic Line A/S ileqquusumik ataatsimeersuarpoq.

Ingerlatseqatigiiffiup ukiumoortumik nalunaarutaata akuersissutigineqarnissaa ataatsimeersuarnermi oqaluuserisassanut ilaatigut ilaavoq.

Royal Arctic Line 2013-imi assartukkat malunnaatilimmik ikileriarsimanerannik sunnerneqarsimavoq, tamatumalu kingunerisaanik ingerlatseqatigiiffiup kaaviiaartitai appariarsimapput. Taamaattumik ukiumoortumik nalunaarummi takuneqarsinnaavoq akileraarutit ilanngaatiginagit 20 mio. kruuninik amigartooruteqartoqartoq akileraarutillu ilanngaatigereerlugit 14 mio. kruuniullutik.

Royal Arctic Line 1995-imili aatsaat amigartooruteqaqqippoq, angusallu naammaginanngillat.

Tamanna tunngavigalugu 2014-imi aningaasartuutit ingerlaavartumik sukannersumik aqunneqassapput sipaarniarfiusussanillu ujarlertoqassalluni.

Royal Arctic Linep piginnittunut, Kalaallit Nunaanni Namminersorlutik Oqartussanut, 25 mio. kruuninik isertitanit tunniussinissaa ataatsimeersuarnermi akuersissutigineqarpoq.

”Nunap attaveqatigiissutit ingerlalluartut isumalluutigivai, taakkulu tassaapput Nuummi umiarsualiviup nutaap umiarsuillu nutaat pilersitseqataaffigisassaat. Naak 2013-imi angusat naammaginanngikkaluartut, attaveqatigiissutinut aningaasaliissuteqarnissat inuiaqatigiinnut siunissami ungasinnerusumi iluaqutaasussat pisariaqarput. Naak siunissaq qaninnerusoq isigalugu aningaasaqarnikkut unammilligassat sammineqartussaagaluartut, siunissamut ungasinnerusumut isiginissaq eqqaamaneqartuartariaqarpoq,” Martha Labansen, siulersuisuni siulittaasuusimasoq 2013-imi Ukiumoortumik Nalunaarummi allappoq.

Siulersuisuni ilaasortani taarsiisoqaqaaq

Ataatsimeersuarnermi Royal Arctic Linep Kuno Fencker siulersuisuni siulittaasutut kiisalu Erik Østergaard, Mai Lill-Ipsen aamma Amma Knudsen siulersuisuni ilaasortatut nutaatut tikilluaqquai.

Ataatsimeersuarnermissaaq siulittaasuusimasoq Martha Labansen, siulittaasup tulliusimasoq Kristian Lennert kiisalu siulersuisuni ilaasortaasimasut Bent Østergaard aamma Ole Frie inuulluaqquneqarput.

Siulersuisuni ilaasortaq Tanja Nielsen siulersuisuni ilaasortatut qinigaaqqippoq.

”Mannamut siulersuisuusimasut ukiut ingerlanerini Royal Arctic Linemut pingaarutilimmik suliaqarsimapput. Tamanna pillugu taakkua qutsavigerusuppakka. Siulersuisuni ilaasortanut nutaanut taama piginnaasaqartigisunut ukiunilu aggersuni suleqatigilluarnissaannut qilanaarisatsinnut tikilluaqqusisinnaagatta nuannaarutigaarput,” Naalakkersuisut Siulittaasuat Aleqa Hammond oqarpoq.

Paasissutissat sukumiinerusut:

Paasissutissat sukumiinerusut naalakkersuisoqarfimmi pisortaanermut Svend Hardenbergimut, Naalakkersuisut Siulittaasuata Naalakkersuisoqarfia, oqa. 34 50 00, saaffiginninnikkut pissarsiarineqarsinnaapput.