Aalisarnermi suliniutit suliassaqartitsilluassapput

Stemningsbillede

Aalisarnermut, Piniarnermut Nunalerinermullu Naalakkersuisoq, Finn Karlsen, tusagassiortunik ullumi, marlunngornermi katersortitsisoqarmat oqarpoq nunatsinni aalisarneq amerlasuunik suliffissaqartitsilersinnaasoq. Finn Karlsen saqqummiussinermini erseqqissaavoq aalisarneq pillugu maannakkut suliutigineqartut landskarsimut immikkut aningaasartuutaassanngimmata.

Finn Karlsenip Inuussutissarsiornermut Aatsitassanullu Naalakkersuisoq Jens-Erik Kirkegaard tusagassiortunik katersortitsinermi peqatigivaa. Saqqummiussaat qulequtaqarluni suliffissaaleqinerup akiorneqarnissaa.

Finn Karlsenip aalisarneq pillugu suliniutigineqartut uku saqqummiuppai:

Umiarsuarnik tunitsiviliinissaq aamma aalisariutit tunitsivittut atorneqarsinnaanissaat suliffissuarnullu assartuutaasinnaanissaat.

Umiarsuit tunitsiviit qaleralinnik tunisassiorsinnaasut marluk Upernaviup eqqaani qaleralinnik aasaru tunitsivigineqalissapput.

Nilak Aps-ip aalisariutaata assagiarsunnik tunitsivigineqarsinnaassaaq pisaasimasullu suliffissuarnut assartuussinnaassagai. Taamaalilluni assagiarsunniarfiit siammarneqassapput Paamiut Alluitsup Paallu suliffissuanut aalaakkaasumik tunisisoqarsinnaalissalluni.

Kangaamiut, Atammiup, Nuup Qeqertarsuatsiaallu eqqaanni aalisariut saarullinnik tunitsivittut atorneqarsinnaassaaq, pisaasimasut suliffissuarnut assartuunneqartassallutik

Aalisariutit marluk 74-serit Paamiut Alluitsup Paallu avataanni saarullinniarsinnaassapput, illoqarfinni pineqartuni suliffissuit saarullinnik pilersorneqarsinnaalissallutik.

Kujataani Tunullu kujataani saarulliit suffinerisa nalaanni saarullinniarnissamik immikkut akuersisoqarpoq. Saarulliit aalisarneqartut Nanortallip Qaqortullu suliffissuinut tulaanneqartassapput, suliffissuarni aalaakkaasumik sulisoqalissalluni. Aalisartullumi aamma aalaakkaasumik suliffissaqartinneqalissapput.

Pisassiissutit amerlineqassapput aalisarnermillu misileraanissamut akuersisoqarluni

Aqutsiveqarfimmi Upernavimmi umiatsiaaqqat pisassaat 500 tonsinik amerlineqarput.

Tunumi misileraalluni aalisarsinnaanermut akuersisoqarpoq, aalisakkat uku aalisarneqarsinnaassallutik; qalerallit, saarulliit, suluppaakkat, nataarnat, najorpilikkat, assagiarsuit, qeeqqat aamma eqaluit.