Pingaaruteqarpoq isumasioqataasut tusaanissaat

Fiskeriseminar

- Aalisartut isumasioqatigiinnermi oqaatigisaat tusaassallugit pingaartilluinnarpara, taama Aalisarnermut, Piniarnermut Nunalerinermullu Naalaakkersuisoq, Finn Karlsen, aalisarneq pillugu isumasioqatigiinnerup ulluani siullermi oqaluuserineqartut tusarnaareerlugit ippassaq oqarpoq.

Aalisarneq pillugu isumasioqatigiinneq ippassaq allartippoq. Nunarput tamakkerlugu peqataasut 170-it missaanniillutik.

- Isumasioqatigiinnermi naalakkersuinermik suliallit tunuarsimaarnissaat pingaartilluinnarpara, soorlu nammineerlunga aalisartut oqaatigiumasaat pingaartillugit ippassaq tunuarsimaartunga, oqaluuserisaannullu akuliukkumananga, Finn Karlsen erseqqissaavoq.

Aalisarnermut, Piniarnermut Nunalerinermullu Naalakkersuisup pingaartilluinnarpaa aalisarnermut inatsisip allannguuteqarnissaa pillugu siunnersuutip pinnginnerani isumasioqatigiittoqarnera.

Ilimasaarutigineqareersutut aalisarnermut inatsisissap allanngortinneqarnissaa pillugu siunnersuut Inatsisartut upernaaq manna ataatsimiinneranni oqaluuserineqartussaagaluartoq kinguartinneqarpoq.

Aalisarneq pillugu isumasioqatigiittoqareerpat suleqatigiissitamik pilersitsisoqassaaq, oqaatigineqarsimasut tunngavigalugit suliaqartussamik.

- Oqaatigineqartut aalisarnermut inatsisip allanngortinneqarnissaa pillugu siunnersuummut ilanngunneqassapput. Erseqqissassavarali aalisarnermut inatsisip allanngortinneqarnissaa pillugu siunnersuutissaq kisiat pillugu isumasioqatigiittoqanngimmat.

Aalisarnermut, Piniarnermut Nunalerinermullu Naalakkersuisoq erseqqissaavoq isumasioqatigiinnermi oqaluuserineqartut ilaat Aalisarnermut, Piniarnermut Nunalerinermullu Naalakkersuisoqarfimmi oqaluuserineqartarlutillu piareersarneqartut, soorlu aqutsiveqarfissat avinneqarnissaannut tunngasut. Soorlu aamma umiatsiaaqqamik aalisartut saattuarniarsinnaanngornissaat pillugit oqaluuserineqartartut.

Isumasioqataasut eqimattakkuutaani arfinilinni oqaluuserisatik ullumi nangissavaat. Eqimattakkuutaani oqaluuserineqartut tassaallutik; qaleralinniarneq, raajarniarneq, saarullinniarneq, saattuarniarneq, aalisakkat ikeriinnarmiut pillugit, kiisalu nutarsaalluni aaqqissuussinissat nutaat pillugit.

Eqimattakkuutaani oqaluuserineqarsimasut ualeru oqaluuserineqarlutillu inernilerneqassapput. Saqqummiussisoqareerpat Aalisarnermut, Piniarnermut Nunalerinermullu Naalakkersuisoq, Finn Karlsen, naggataarutaasumik oqaaseqassaaq.