Pisortat suliassaqarfianni aningaasaqarneq tatineqarpoq

KANUKOKA Naalakkersuisut Namminersorlutik Oqartussat kommunillu, aamma KANUKOKA ullumi ataatsimiipput. Ataatsimut unammilligassat taakkulu aaqqinneqarnissaat ilaatigut oqaluuserisassaapput.

KANUKOKA-p siulittaasua Martha Abelsen oqaaseqarpoq:
Nunatsinni aningaasaqarnikkut inissisimaneq ilungersunartoq eqqartorparput. Kommunit aningaasaqarnerat maanna tatineqareeqaaq innuttaasullu katitigaanerisa allanngoriartornerat peqatigitillugu aningaasartuuteqaleriartuinnassaagut.

Inatsisartuni kommuninilu politikerit sivisuumik attanneqarsinnaasumik aningaasaqarnikkut ineriartornissaq qularnaarniarlugu maanna akisussaalertariaqalerput. Tamatumani namminersortut suliassaqarfianni suliffeqarfinnik atasinnaasunik nutaanik pilersitsiviusinnaasunik amerlanerusunillu sulilersitsiviusinnaasunik aaqqissuusseqqinnissamut unammillersinnaanermullu pitsanngorsaataasunik suliniuteqarnissamut politikikkut sapiissuseqarnissaq piumassuseqarnissarlu pisariaqarpoq. Tamatumunnga peqatigitillugu periarfissalinnut sivisunerusumik suliffeqartitsiinnarnissaq anguniagaavoq. Ajornartorsiutit aaqqinnissaat kinguartittuaannarsinnaanngilarput.”

Aningaasaqarnermut Nunamullu Namminermut Naalakkersuisoq Vittus Qujaukitsoq oqaaseqarpoq:
”Kommunini tamani siuariartortitsiviusumik innuttaasunut toqqissisimatitsinissamut oqimaaqatigiissumillu ineriartortitsinerup qularnaarneqarnissaanut Naalakkersuisut kommunillu ataatsimut akisussaaffeqarput. Qaninnerusoq eqqarsaatigalugu nunatsinni ingerlataqarnerulernissaq suliffissaqartitsinerulernissarlu pillugu suliffissaqartitsinissamik siuarsaataasussanik arlalinnik maanna kommunit suleqatigalugit iliuuseqarnialerpugut.

Tamatuma saniatigut siunissaq ungasinnerulaartoq ungasinnerusorlu eqqarsaatigalugit suliffissaqartitsinermut aningaasaqarnermullu iluaqutaasumik sunniuteqartussanik aaqqissuusseqqinnissamut suliniuteqarnissamut piareersarpugut. Aaqqissuusseqqinnerit atasinnaanissaat qularnaarniarlugu sangujoqisaartumillu ingerlanissaq pinngitsoorniarlugu aningaasaqarneq pillugu politik ungasinnerusorlu eqqarsaatigalugu aaqqissuusseqqinneq pillugu politik pillugit naalakkersuinikkut isumaqatigiittoqarnissaa Naalakkersuisut kissaatigisorujussuuaat. Taamaattumik pineqartut tamakku pillugit Inatsisartuni partiit siunissami qaninnermi oqaloqatigilerniarpakka.

Aammattaaq pisortat suliassaqarfianni aaqqissuussaaneq suliassanillu agguataarineq eqqartorpavut. Aaqqissuussaanermik aaqqissuusseqqinneq aallartereersoq siullermillu atuarfeqarnermut tunngasuni sanaartugassanik kommuninut nuussineq nutarterinermik suliniutinut peqatigitillugit innuttaasunut pitsaanerusumik kiffartuussinissamut pisortallu suliassaqarfianni pisariillisaanerunissamut tapertaassapput.”