Eqqaaniut

Finn Lynge Finn Lynge akornatsinniikkunnaarpoq.

Nulianut Riemut, meeraanut ilaqutaanullu tamanut qamannga pisumik misiginneqatiginninnerput ataqqinnerpullu apuukkusupparput.

Nunaqqatigiilluta oqaluttuarisaanitsinnut annertuumik sunniuteqarsimasumik, anersaakkut inuiattullu nukittunerulersitsisimasumik, minnerunngitsumillu inuiaqatigiittut immitsinnut piumaffiginerusinnaanitsinnut apeqqusiisinnaanitsinnullu annertuumik sunniuteqarsimasumik annaasaqarpugut.

Finn Lynge Nunatsinni tamanit annerungaartumik kalaallit piniartortatta atugaat nunarsuarmioqatitsinnit, soorlu Naalagaaffiit Peqatigiinnit, EF-iusimasumit, Nunarsuaq Tamakkerlugu Pinngortitap Piujuaannartinneqarnissaanut Kattuffimmit Nunarsuarmi Arfanniartarneq pillugu Ataatsimiititaliarsuaq aqqutigalugit paaseqqullugit illersorlugillu assoroorsimavoq, paasitikkumallugit inuuniarnitsinni atukkatta allamiunut sanillersuunneqarsinnaanngissusaannik aammalu nungusaataanngitsumik tunngaveqartumik ingerlatsinitsinnik paasisimasaqaqqullugit. Nunatta nunanut allanut politikkia Finnimit annertuumik tunaartalerneqarpoq, malunnaateqarluartumik.

Finn Lynge inuttut ilisarisimavara. Inuusuttuaraallunga naapippara puiguikkiullugulu. Oqaasii, iliuusai, pingaartitai, nuannarisai, oqaluttuassartaa aammalu eqqarsartariariaasianut annertuumik nuannaartorinnillunga ataqqinnillungalu ippunga. Isumaqatigiittuaannarsimanngilagut, tassami isumaqatigiinngikkaluarluni oqallinnissamut inissaqartitsisoq ataqqinartuummat. Inuk imartooq, qarasarissoq, eqqarsaqqissaartartoq nunaminullu tunniusimasoq eqqaamajuassavarput, tamattalu pigisutut qanigisatullu illugu. Iggattarsimavara mamarsartarneralu allanit soorlu annerusartoq, nuannariuarsimavaralu isertissallugu oqaloqatigissallugulu.

Naapittarsimanivut tamarmik uaneerarsuarmiittutut ipput, pingaartumik ullumi.

Finnimik ilisarisimannittut, ilisarisimannilaartut ilisarisimanninngitsulluunniit tamatta inuusimanerminit pingaaruteqarluinnartunik tunissuteqarfigisimavaatigut annertuumik.

Finni akornatsinniikkunnaaraluarluni atuakkiamigut sunniuteqarluarami apuussarpassuaqaramilu isummersornitsigut tassuuna aamma akornatsinniittuassaaq.

Finn Lynge eqqaamaneqartuaannarumaarpoq.

Finn Lyngep Nunarput sinnerlugu sullissinermini kalaallit inuiaat nipaat, sunniuteqarnerat aammalu nukittunerat takutippai – tunngavilerlugu Issittormiuusugut allatuulli politikkikkut pingaartigisumik oqaasissaqaannarata isumaqatiginninniarfigisassatulli pingaartitatut inissisimalersinneqarluta.

Finn Lyngep eqqaaneqarnera ataqqinartuuli.



Inussiarnersumik inuulluaqqusillunga


Aleqa Hammond
Siumup Naalakkersuisullu Siulittaasuat