ICC-imut tapersiissutit

ICC-imut tapersiissutit ukiut arlallit ingerlaneranni annikilliartortinneqassapput

ICC aningaasanut inatsit pissutigalugu matunissaa aarlerinartorsiortoq, kiisalu ICC-ip Inuuvik-mi aasamut ataatsimeersuarnerani ICC Kalaallit Nunaata peqataanissaa aningaasassaqannginneq pissutigalugu taamaatinneqarsinnaasoq, ICC-ip siulittaasua Aqqaluk Lynge Sermitsiami aamma KNR-imi ataasinngorneq ulloq 7. april issuarneqarpoq.

ICC nunap immikkoortuini issittuniittuni Inuit akornanni suleqatigiinnermut nukittorsaaqataalluni pingaaruteqartorujussuarmik suliassaqartoq Naalakkersuisut uppernarsarusuppaat.

Eqqorpoq ICC Canada-mut aamma ICC Alaska-mut tunngatillugu pisartutut, ICC ullumikkut pisartunit annertunerujussuarmik ingerlataminnut nunani tamalaani pisussanut pilersaarutinit aningaasaateqarfinnillu aningaasaliissutinit matussusiiniartariaqarmat, maannakkut ICC-mut tapiissutaasartut, 2013-imi 5,3 million koruuniusut, ukiut arlallit ingerlaneranni 2014-imut aningaasanut inatsimmit aallartittumik annikilliartuaartinneqassasut Inatsisartut aalajangiisimammata.

Aleqa Hammond oqarpoq:

”ICC annertunerujussuarmik nammineertariaqartoq politikkikkut kissaateqarnerput nutaajunngilaq.

Taamaalilluni ICC-mut tapiissutit atorunnaarsikkiartuaarneqarnissaat 2008-imili aningaasanut inatsimmut atatillugu oqallisigineqartarpoq, aammalu Naalakkersuisunit siulitsinnit (IA, Demokraatit aamma Kattusseqatigiit) 2010-imi, 2011-imi aamma 2012-imi siunnersuutigineqartarluni.

ICC Canada aamma ICC Alaska nunami namminermi aamma nunani tamalaani pisussanut pilersaarutinut aningaasaateqarfinnullu qinnuteqaateqarnermikkut annertoorujussuarmik namminneq ingerlataminnut matussusiisarput.

ICC-ip suliamik taamaattumik ingerlatsisarnermi ukiorpassuarni pitsanngorsaasinnaasimavoq, taamaattumillu ICC-ip tamanna tupaallaatigisinnaanngilaa.”

ICC-ip ataatsimeersuarnissaa 2014-imi Canadami Inuuvik-mi ingerlanneqartussaavoq. ICC Kalaallit Nunaat ataatsimeersuarnermut peqataanissamut immikkut ittumik 100.000 koruuninik qinnuteqarpoq aammalu Nunanut Allanut Pisortaqarfiup Nunanut allanut kontuanit taakkuninnga aningaasaliiffigineqarluni.

ICC Kalaallit Nunaannit ilisimatitsissutigineqarpoq ataatsimeersuarnermi peqataanissaminnut missingersuutit 2,2 millioner koruuniusut.

Aleqa Hammond,
Naalakkersuisut Siulittaasuat