Amerlangaassutsimik ersersitsisuupput

Ullut erfalasoqarfissat assigiinngisitaarnikkut amerlangaassutsimik ersersitsisuupput

Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisup eqqumiigai Nikku Olsen-ip ullut erfalasoqartarfigut pillugit oqaaserisai, issuarneqarmat oqarsimasoq apriilip ulluisa 9-anni Danmark-ip sorsunnersuit aappaanni ullormi tiguagaaffigisaa erfalasutta qiteqqusimasarnera tassaasoq ”danskit naleqartitaannut anngaaginnartussaanitsinnut ersiutaasoq”.

Nick Nielsen isumaqarpoq, pisortatigoortumik ullup taassuma erfalasulerfiusarnera naleqartitatsinnik arlalissuarnik ersersitsisoq, oqarlunilu;

”Uanga isumaqarpunga kalaallit uagut amerlasuunik naleqartitaqartugut, soorlu assigiinngisitaarnitsigut amerlangaassuserput, ataatsimoorussagut ammasuunerpullu. Naleqartitat uagut inuiattut nukittoqutigisagut, uagut akunnitsinni immitsinnut naapikkaangatta aammalu inuit nunanit allaneersut naapikkaangatsigit. Naleqartitat uanga Naalakkersuisut eqqumiitsuliornikkut kulturikkullu anguniakkatsinni ilanngutakka tassaapput ataatsimoorneq, ilinniarumaneq, nutaaliorneq, piujuaannartitsineq aamma oqallitsitsisarneq. Tamakkuupput naleqartitat uagut inuiattut siunissatsinnut isumatusaartumik tikkuussisut. Tamakkua aamma tassaapput naleqartitat ilassarsiortut avissaartuutitsinngitsullu.
Ulloq 9. april ilisarnaatitut annertuumik naleqarpoq. Takutippaami kisermaassillutik pissaaneqarniartut akuerinngikkigut, soorlu Tysklandi sorsunnersuit aappaata nalaani. Ulloq erfalasulertarfik taanna takutitsivoq uagut upperigipput eqqissisimasumik inooqatigiinneq, oqaloqatigiinneq aamma ataqqeqatigiinneq, naalagaaffiit akornanni, soorluttaaq aamma Naalagaaffeqatigiinnitsinni. Taamaattumik uanga isumaqarpunga 9. april nunatsinni pisortatigoortumik erfalasulertarfipput assut naleqartoq, uangalu inuttut kalaaliusutut tulluusimaarutigaakka ileqqup taassuma ersersitai. Aamma ulloq taanna uagut kalaallit erfalasorput atorlugit malunnartinneqarsinnaalluarpoq.

Taamaattumillu uanga Nikku Olsen-i kaammattorumavara ulloq erfalasulertarfik taanna nunatsinni inuppassuartulli allatut misigeqqullugu, - uagut inuiattut nukittussutitsinnik ersersitsisutut. Nukittussuseq uagutsinnik namminersuleriartornermut ingerlatsisoq, namminersuleriartornermik ungasilliartortitsisuunngitsoq”.

Inussiarnersumik inuulluaqqusillunga

Nick Nielsen