Aleqap japanimiut nunanut allanut ministeriat ataatsimeeqatigaa

Aleqa holder møde med Japansk udenrigsminister

Naalakkersuisut Siulittaasuata danskit nunanut allanut ministeriat Martin Lidegaard peqatigalugu japanimiut nunanut allanut ministeriat, taassuma Danmarkimi tikeraarneranut atatillugu, ullumi ataatsimeeqatigaa.

Ataatsimiinnermi sammineqartut pingaarnerit tassaapput Issittumi suleqatigiinneq, ullumikkut IWC-mi (Nunarsuarmioqatigiit Arfanniarneq pillugu Ataatsimiititaliarsuanni) inissisimaneq aamma Naalakkersuisut Siulittaasuata 2014-imi decemberip qaammataani Japanimut tikeraarnissaa.

Naalakkersuisut Siulittaasuat Aleqa Hammond ataatsimeeqatigeereernerup kingorna ima oqarpoq:
”Ullumi danskit nunanut allanut ministeriat peqatigalugu japanimiut nunanut allanut ministeriannik ataatsimeeqateqarsimanera nuannaarutigaara. Uannut pingaaruteqarpoq, kalaallit danskillu nukittuffigisarpassuagut aqqutigalugit pitsaasumillu tunniusseqataaffigisinnaasatsigut qanimut suleqatigiinnissarput.

Issittumi Siunnersuisoqatigiinni Japanip ataavartumik alaatsinaattutut inissisimalernera pillugu japanimiut nunanut allanut ministeriannut tikilluaqqusisinnaanerma nuannaarutiginera kiisalu Issittumi Siunnersuisoqatigiinni nunat alaatsinaattutut ilannguttut Issittumi inissisimanertik qanoq igissaneraat qilanaarinerarlugu, nunanut allanut ministeri oqarfigaara. Issittumi innuttaasut Issittumi ineriartornermut maannakkut pisumut siunissamilu piumaartussamut qiutiutillugit inissisimanerisa qulakkeerneqarnissaat pillugu suleqatigiinnissamik Nunatsinni piumassuseqarnerput aamma oqaatigaara.

IWC-mi, kalaallit japanimiullu misilittagaqarfigilersimasaanni akunnitsinnilu siunissami miluumasut imarmiut pillugit attanneqarsinnaasumik ingerlatsinissaq pillugu immitsinnut iluaqutaasussamik nunat tamalaat akornanni suleqatigiinnermi misilittagarilerumaagassatsinnik paarlaasseqatigiittarsinnaanerput aamma eqqartorparput.

Japanimiut nunanut allanut ministeriata ataatsimiinnermi erseqqissarpaa, arfeqassutsip attanneqarsinnaasumik ingerlanneqarnissaani Kunngeqarfiup Danmarkip ingerlaavartumik suleqatiginissaata pingaaruteqarnera.

Naalakkersuisut 2014-imi decemberimi pisortatigoortumik Japanimut tikeraarnissartik pilersaarutigaat. Ullumikkut ataatsimeeqatigiinnerup Japanimut tikeraarnissap imassaanik piareersarluarnissatsinnut pitsaasumik periarfissippaatigut. Japanimi tikeraarnissanni inuussutissarsiortut imaanit pisuussutinik, takornariaqarnermik, puisit amiinik tuniniaanermik aatsitassarsiornermillu inuussutissarsiutillit peqataassapput, taakkualu peqataanerat aamma Nunatta Japanillu akornanni inuussutissarsiornikkut siuarsaanermut aallaavioqataasussamik pilersitsiviussaaq.

Japanimiut sivisuumik ikinngutigaavut, taakkualu aalisarnermik uuliasiornermillu ineriartortitsinitsinni peqataasimapput. Japanip Issittumik sammisaqaqqilerneratigut, attaveqatigiinnerput piffissamut pissanganartumut alloriaraluttualerpoq. Taamaattumik ullumikkut ataatsimeeqatigiinnerput Kalaallit Nunatta Japanimut attaveqarnerata ineriartorteqqinnissaanut aallaavissaqqissuuvoq”.