Nuna tamakkerlugu ilitsersuisarfik

Nuna tamakkerlugu ilitsersuisarfimmi atorfinititsineq, Kalaallillu nunaanni ilitsersuisarneq pillugu siunnersuisoqatigiit ilaasortassaanik toqqaaneq

Kalaallit Nunaanni ilinniartitaanermut inuussutissarsiutinilu siunnersuisarneq pillugu Namminersorlutik Oqartussat inatsisaat nr. 4, 29. november 2013-imeersoq naapertorlugu Naalakkersuisut Kalaallit nunaanni ilitsersuisarneq pillugu siunnersuisoqatigiit ilaasortassaanik toqqaasimapput. Ilaasortat peqatigiiffiit/kattuffiit makkua sinnerlugit qinigaasimapput: Sulinermik inuussutissarsiutillit kattuffiinit, Sulisitsisut kattuffiinit, ilinniagaqartut kattuffiinit, KANUKOKA, kiisalu ilinniarfinnit: Ukua toqqarneqarsimapput:

  • Sofie Svendsen, SIK
  • Karsten Lyberth-Klausen, GA
  • Thora Siegstad, KANUKOKA
  • Hans Peder Kirkegaard, Ilinniagaqartut kattuffiat
  • Lena Mathiesen FLY, Ilinniarfiit (SPS)

Ilanngullugu nalunaarutigineqassaaq Else Poulsen nuna tamakkerlugu ilitsersuisarfimmi pilersinneqaqqammersumi pisortatut atorfinitsinneqarmat.

Else Poulsen Århusip Universitetiani psykologitut ilinniarnikuuvoq ukiunilu tallimani Qaqortumi ilinniarnertuunngorniarfimmi rektoriusimalluni. Else Poulsen psykologitut rektoritullu sulinermini ilinniartitaanermik annertuumik ilisimasaqalernikuuvoq aammalu ilinniagaqartunut inuussutissarsiornermillu ilitsersuisarnermik aamma tarnip pissusaanik inuttullu atukkanik siunnersuisarnermik suliaqarsimallunilu.

Nuna tamakkerlugu siunnersuisarfimmi siunertaavoq Kalaallit Nunaanni ilitsersuisarnerup ineriartortinneqarnissaa pitsaassusaatalu qulakkeerneqarnissai, tunngaviusumik ilinniarnernik ingerlaqqillunilu ilinniarnernik ilitsersuisarnermik neqerooruteqartarneq kiisalu ilinniartunut tamanut innuttaasunullu Piareersarfinni ilinniartunut nuna tamakkerlugu inuttut atukkatigut tarnillu pissusaatigut siunnersuisarnermik pilersitsineq ingerlatsinerlu.