Tunitsiviit ilassapput

Nunaqarfinni tunitsiviit pingasut atulissapput

Aappilattumi, Attumi Ikamiunilu tunitsiviit kingusinnerpaamik juunip aallaqqaataani 2014 ammaqqinneqassapput.

Tunitsiviit nunaqarfinni illoqarfinnilu arlalinni matoqqasut ilagaat tunitsiviit qulit Royal Greenlandip Arctic Green Food A/S akiliisinnaajunnaarmat ingerlatarilersimasai.

- Tunisassiorfiit Royal Greenlandimit ingerlanneqalersut aserfallassimaqaat ukiunilu arlaqartuni aserfallatsaaliorneqarsimanatik, taama Aalisarnermut, Piniarnermut Nunalerinermullu Naalakkersuisoq, Finn Karlsen, Saxtorph Didriksenip paragraf 37 tunngavigalugu apeqqutaanut akivoq.

Inatsisartuni ilaasortaq aperivoq nunaqarfinni illoqarfinnilu tunitsivinnik matoqqaannartunik siornatigut iliuuseqarfigineqarneq ajortut ullumikkut qanoq sulissutigineqarnersut.

Qaanaami Maniitsumilu tunisassiorfiit Royal Greenlandip ingerlatariligai tunisassiorsinnaanermut taamaallaat akuersissuteqarput. Taakku Greenland Proberties A/S-ip, ingerlateqatigiiffiup peqatigisimasaata AGF A/S-imit pigisaasimapput.

Royal Greenland ilisimatitsivoq tunitsiviit matoqqasut ammaqqinniarlugit aningaasarpaalussuarnik atuisimallutik.

Napasumi tunitsivimmik piginnittuulertoq Lilleholm ApS ilisimatitsivoq tunitsivik kingusinnerpaamik juunip 15-nianni 2014 ammaqqinnissaa naatsorsuutigineqarsinnaassasoq.

- Sumiiffiit ilaanni umiarsuarmik tunitsiviliinissamik kissaateqartoqassappat Naalakkersuisut qinnuteqaat akuersaarumaaraat, Aalisarnermut, Piniarnermut Nunalerinermullu Naalakkersuisut, Finn Karlsen erseqqissaavoq.