Saarullinnut umiarsuarmik uumatitsivittaliinissaq akuerineqarpoq

Royal Greenlandip umiarsuarmik saarullinnut uumatitsivittalimmik umiarsualiissalluni qinnuteqaataa Naalakkersuisunit akuerineqarpoq. Umiarsuaq Kangaamiuniit Qeqertarsuatsiaanut maajimit septembarimut 2014 angalasassaaq.

Naalakkersuisut aamma akueraat sineriammi pineqartumi Royal Greenland umiarsuarmik saarullinnut uumatitsivittalimmik umiarsualiinissaanut atatillugu ungusiveqartitsisinnaasoq, tukertitsivittut ilusilinnik.

Royal Greenlandip saarullinnut uumatitsivittalimmik umiarsualiinissaa saarullinnullu ungusiviliinissaa, immikkut pisinnaatinneqarluni akuerineqarpoq, umiarsuarnut saarullinnut tunitsiviliisarnermut maleruagassat tunngavigineqaratik.

Royal Greenlandip qinnuteqaataa naapertorlugu saarulliit bundgarnimiittut immikkoortitsivimmut milluarneqartassapput, tassani mikinerit uumatillugit imaanut iginneqartassallutik.

Saarulliit pisarineqarsimasut uumatillugit ungusivinnut arfineq marluusunut pineqartassapput, taakkunani ullut arfineq marluk angullugit nerisaqartassallutik, kingorna umiarsuarmi suliarineqarsinnaasut naapertorlugit aalisarneqartassallutik, qaloorneqartassallutik.