Inatsisitigut ataataqanngitsut pillugit tusagassiorfinnut nalunaarut

Naalakkersuisut Siulittaasuat, Aleqa Hammond, ullumi inatsisigut ataataqanngitsut pillugit tusagassiortunik katersortitsivoq. Tusagassiortunik katersortitsinermi sarsuatitat nalunaarummut matumunnga ilanngunneqartut takkuttunut agguaanneqarput. Takkuttut ilaat tassaapput Statsministeriaqarfimmit aamma Folketingip Kalaallit Nunaat pillugu Ataatsimiisitaliaani sinniisut.

Naalakkersuisut Siulittaasuata suliami Nunatsinni naalagaaffeqatigiinnermut annertuumik sunniuteqartussatut nalilerneqartumut, danskit ministeriunerannik suliaq pineqartoq pillugu eqqartueqateqarnissaq siunertaralugu ataatsimeeqatiserinnittarnerigaluani iluatsinngitsut pillugit nassuiaavoq.

Ataatsimeeqatiserinnittarnerit danskit ministeriunerata oqaaseqarfigisarsimanngilai, kisiannili taarsiiviginninnissaq itigartissimallugu, danskit naalakkersuisuisa paasinninnerat naapertorlugu, inatsisitigut ataataqanngitsunut tunngatillugu inatsisitigut inissisimanerup qulakkeerneqarnissaa pisariaqartoq iliuuserineqareersutigut naammassineqareersimammat.

Naalakkersuisut Siulittaasuata erseqqissarpaa, danskit ministeriunerannik Helle Thorning-Schmidtimik suliaq pillugu sukkulluunniit ataatsimeeqatigiinnissamut suli piareersimalluni.

 

Inussiarnersumik inuulluaqqusillunga

Aleqa Hammond
Naalakkersuisut Siulittaasuat